ბიეთის ტაძარს რესტავრაცია ჩაუტარდება [Photo/Video]

ბიეთის ღვთისმშობლის სახელობის ტაძარში გაწმენდით სამუშაოებს კომპანია „ივერთმშენი“ ატარებს.

„ეკლესიის გარშემო მიწა უკვე გავთხარეთ, გვაინტერესებდა საძირკველი როგორი იყო. ნებართვას ველოდებით ძეგლთა დაცვიდან და გათხრებს ტაძრის ეზოშიც დავიწყებთ“, – ამბობს კომპანია „ივერთმშენის“ დირექტორი ედიშერ ჯანჯულია.



ბიეთის ნაწილი – გუმბათის ფრაგმეტნი, კამარები, თაღი და დასავლეთის ფასადი დანგრეულია, ამიტომ ინტერიერი ქვებითაა სავსე. ამ დროისთვის ტაძარში მხოლოდ აღმოსავლეთის ფასადი და კედლებზე ფრესკების ნაწილია შემორჩენილი. კლიმატურ პირობებს ესეც რომ არ დაეზიანებინა, კულტურული მემკვიდრეობისა და ძეგლთა დაცვის სააგენტომ ეკლესიის ეს მონაკვეთი გადახურა და მომავალი წლიდან კი ტაძრის სრულ რესტავრაციას გეგმავს.

„ჩვენი ნებართვით მიმდინარეობს არქეოლოგიური შესწავლა. არქეოლოგების ზედამხედველობითვე ტაძარს წმენდს „ივერთმშენი“. ამ პროცესების დასრულების შემდეგ შემუშავდება საპროექტო დოკუმენტები, რაც ტაძრის კომპლექსურ რეაბილიტაციას გულისხმობს. 2019 წლიდან კი ბიეთი შევა სააგენტოს სარეაბილიტაციო ძეგლების ნუსხაში“, – გვითხრეს კულუტურული მემკვიდრეობისა და ძეგლთა დაცვის სააგენტოს საზოგადოებასთან ურთიერთობის სამსახურში.

უწყბაში ამბობენ, რომ ბიეთის რესტავრაციისთვის თანხა სახელმწიფო ბიუჯეტიდან ან „ქართუ ფონდიდან“ გამოიყოფა: „ეს ჯერ ზუსტად გადაწყვეტილი არ არის. პროექტი ალბათ უფრო „ქართუს ისტორიულ ძეგლთა დაცვისა და გადარჩენის ფონდიდან“ დაფინანსდება“.









[თორნიკე ზაზაძე, ნანა ინასარიძე, ახალციხე]