პრეზიდენტობის კანდიდატი გრიგოლ ვაშაძე ახალციხელებს შეხვდა

პრეზიდენტობის კანდიდატი გრიგოლ ვაშაძე ახალციხეს დღეს, 18 სექტემბერს, გაერთიანების ლიდერებთან გიორგი ვაშაძესთან და ზურაბ ხარატიშვილთან ერთად სტუმრობდა.

„ჩვენ ვიქნებით გარანტი იმისა, რომ პენსია გახდება 400 ლარი, მასწავლებლის ხელფასი იქნება 1000 ლარი, მორატორიუმი გამოცხადდება უსამართლო კრედიტებზე, რომელიც ახრჩობს საქართველოს. ჩვენ ისევ ამოვდებთ ლაგამს კრიმინალს, რომ საქართველოს მოქალაქეს სახლის და მანქანის ღიად დატოვება არ შეეშინდეს“, – განაცხადა შეხვედრაზე გრიგოლ ვაშაძემ.

მან მარიხუანის კულტივაცია–ექსპორტის შესახებ კანონპორექტზეც ისაუბრა და განაცხდა, რომ აღნიშნული საკითხი ქვეყნის ეკონომიკას უკან დაწევს: „ქართული ოცნება“ ეს არის ბიტკოინების ქარხნები, რომელიც ასი მითიური საწარმოს მაგივრად ააშენეს. ხუთი მითიური მილიონის დაპირება ყველა სოფელს კი არის ის, რომ გაუფასურებულ მიწაზე დაითესონ კანაფი და მარიხუანას პლანტაციები გაგვიკეთონ“.

თეატრის შენობაში ოპოზიციური გაერთიანების პრეზიდენტობის კანდიდატის მოსახლეობასთან შეხვედრა, დაახლოებით, ერთ საათს გაგრძელდა.

ახალციხეში ჩამოსვლმადე გრიგოლ ვაშაძე ბორჯომისა და ადიგენის მოსახლეობასაც შეხვდა.



[ლუბა გიორგაძე, ახალციხე]