ასპინძა – ახალციხის გზაზე მოძრაობა აღდგენილია

სოფელ რუსთავთან, საავტომობილო გზაზე ნალექის შედეგად ჩამოტანილი სილა გვიან ღამით ცოცხალმა ძალამ გაწმინდა.

როგორც ასპინძის მერი, როსტომ მაგრაქველიძე ამბობს, ცალმხრივი მოძრაობა დაახლოებით 00:00 საათისათვის აღდგა. საპატრულო პოლიციის დახმარებით გზაზე შეჩერებულ ავტომანქანებს, რომლებიც ახალქალაქისა და ახალციხის მიმართულებით მოძრაობდნენ, მარჯვენა და მარცხენა მხრიდან გადაადგილება შეეძლოთ.

პარალელურად ცოცხალი ძალა, ნაშალი მასალისგან იმ ტრაილერების გათავისუფლებას ცდილობდა, რომლებიც სილაში ჩარჩნენ.
„მობლიზებული იყო ცოცხალი ძალა, როგორც სამაშველო სამსახურის, ასევე "ჯავახავტოგზის" თანამშრომლები და ახალციხისა და ასპინძის მერიის თანამშრომლები. საბურავების ქვეშ მოყოლილი მასალა ხელით გამოვუწმინდეთ, მერე მანქანები სამაშველო მანქანით ე.წ ჯალამბარით გამოვწიეთ“, – აცხადებს როსტომ მაგრაქველიძე.

მისივე თქმით, საავტომობილო გზის ჩაკეტვა ტრაილერების მძღოლების დაუდევრობამ გამოიწვია: „ეს [კლიდადნ ნაშალი მასალის ჩამოტანა] არ მომხდარა მხოლოდ ერთ ლოკაციაზე, მცირე რაოდენობით რამდენიმე ლოკაციაზე ჩამოიშალა, მაგრამ ამ კონკრეტულ ადგილზე პრობლემა შექმნა იმ ტრაილერების გაჩერებამ. იმიტომ, რომ მანქანა რომ გაჩერდა ჩამოსულ მასას ფაქტობრივად არ ჰქონდა ადგილი რომ ხევში ჩასულიყო“.

[თაკო ფეიქრიშვილი, ასპინძა]