ადიგენის მაჟორიტარი - ივანიშვილის წასვლა ხუხულასავით დაანგრევს ‘ოცნებას’

ახალციხის, ადიგენისა და ასპინძის მაჟორიტარი დეპუტატები აცხადებენ, რომ ივანიშვილი პოლიტიკიდან მხოლოდ მას შემდეგ უნდა წავიდეს, როცა მოსახლეობასთან დადებულ პირობებს შეასრულებს.

„მისი პოლიტიკიდან წასვლით ან დარჩენით ქართულ პოლიტიკას არც არაფერი დააკლდება და არც შეემატება. კოალიცია დაიწყებს თუ არა რღვევას, მისი წასვლის შემდეგ, ეს ჩემი სადარდებელი არ არის. მთავარია, რომ მათი აღებული კურსი ოპოზიციური პარტიის განადგურებისათან დაკავშირებით სისრულეში არ მოვიდეს“, - აცხადებს ასპინძის მაჟორიტარი დეპუტატი ტარიელ ლონდარიძე.

ახალციხის მაჟორიტარი ვაჟა ჩიტაშვილი დარწმუნებულია, რომ ივანიშვილი პოლიტიკიდან არ წავა: „პოლიტიკიდან თავისი ნებით არავინ მიდის. იგი უნდა დარჩეს პოლიტიკაში 4 წელი და დანარჩენს არჩევნებზე ხალხი გადაწყვეტს“.

ჩიტაშვილის აზრით, რადგან ივანიშვილი ამჟამინდელი ხელისუფლების ლიდერია, მისი პოლიტიკიდან წასვლა გარკვეული საფრთხეების შემცველია.

ადიგენის მაჟორიტარი ზურაბ ჩილინგარაშვილი ფიქრობს, რომ ივანიშვილი პოლიტიკიდან არ უნდა წავიდეს: „მან დიდი პასუხისმგებლობა აიღო ქართველი ერის წინაშე, ივანიშვილმა მიიღო ქართველი ერის ნდობა. ამ დრომდე მისი არცერთი შესრულებული დანაპირები არ გვინახავს. ამიტომ, ის რომ წავიდეს და ყველანაირი პასუხისმგებლობა მოიხსნას, არასწორად მიმაჩნია“.

ჩილინგარაშვილი დარწმუნებულია, რომ პრემიერის პოლიტიკიდან წასვლა „ხუხულასავით დაანგრევს“ „ქართულ ოცნებას“: „ამ ნანგრევებში კი, შესაძლოა, საქართველოც მოიყოლონ“.

დეპუტატის თქმით, ივანიშვილის პოლიტიკიდან წასვლას კოალიციაში დაძაბულობა და შესაძლოა პარტიებს შორის დაპირისპირებაც მოჰყვეს: „კოალიციის დაშლა კი ქვეყანაში ძალიან ცუდ რაღაცეებს გამოიწვევს. ამ გადასახედიდან ასე ჩანს და რა იქნება 4 თვის შემდეგ, ძნელი წარმოსადგენია, რადგან ძალიან არაპროგნოზირებად მთავრობასთან გვაქვს საქმე“.

[თამუნა უჩიძე, ახალციხე]

ამავე თემაზე, იხილეთ ვიდეო, რას ფიქრობენ ივანიშვილის შესაძლო წასვლაზე ახალციხის ქუჩებში გამოკითხული მოქალაქეები.