ორფოლოს პოლიგონის საკითხის შესწავლაში ეკონომიკის სამინისტრო ჩაერთო

ახალციხის მუნიციპალიტეტის სოფლების: წნისის, საყუნეთისა და მინაძეს კუთვნილ სახნავ-სათეს ფართობებს წლებია თავდაცვის სამინისტრო წვრთნებისთვის იყენებს.

მოსახლეობა ამ ტერიტორიაზე მიწებს წლების განმავლობაში არ ამუშავებდა, თუმცა, მას შემდეგ, რაც „სამეურნეო ბარათები” დარიგდა, ფართობის დათესვა გადაწყვიტეს. ნაკვეთების დაბრუნების მოთხოვნით ადგილობრივებმა ახალციხის მუნიციპალიტეტის გამგეობას მიმართეს.

გამგეობამ საკითხის შესასწავლად ჯერ საქართველოს თავდაცვის სამინისტროს მიმართა. მოგვიანებით კი საქმეში საქართველოს ეკონომიკისა და მდგრადი განვითარების სამინისტროს ჩართვა გადაწყვიტა.

„ამ ეტაპზე დოკუმენტაცია მზადდება. უახლოეს მომავალში გადავცემთ სამინისტროს“, - ამბობს ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე.

მისი თქმით, საკითხის შესწავლა თავდაცვის სამინისტრომ მიმდინარე წლის მაისში დაიწყო და ჯერ არ დასრულებულა.

შეგახსენებთ, 2011 წლიდან თავდაცვის სამინსტრო ახალციხის მუნიციპალიტეტის სოფლების წნისის, საყუნეთისა და მინაძის მიწის ნაკვეთებს ორფოლოს პოლიგონისთვის იყენებს. მოსახლეობა კუთვნილი მიწების დაბრუნებას ან სანაცვლოდ კომპენსაციას ითხოვს.

[ნინო ზედგინიძე, ახალციხე]