თავდაცვის სამინისტრო ორფოლოს პოლიგონის საკითხს იკვლევს

წნისში, საყუნეთსა და მინაძეში მიწის ის ნაკვეთები, რომლებსაც წლების განმავლობაში თავდაცვის სამინისტრო ორფოლოს პოლიგონისთვის იყენებდა, მოსახლეობას დაუბრუნდება. სწორედ აღნიშნულ საკითხს სწავლობს, მეშვიდე დღეა, თავდაცვის სამინისტროდან ჩამოსული ექვსკაციანი კომისია.

”რატომღაც, 2011 წელს, თავდაცვის სამინისტრო ყოველგვარი გაფრთხილების გარეშე, ხალხის მიწებს დაეპატრონა. მას შემდეგ, რაც გამგებლად დავინიშნე, წნისიდან, მინაძედან და საყუნეთიდან სამინისტროს მიერ მითვისებული მიწების შესახებ ჩემთან არაერთი განცხადება შემოვიდა”, - გვითხრა ახალციხის მუნიციპალიტეტის გამგებელმა ბესიკ ბლიაძემ.

სწორედ მის მიერ მიწოდებული ინფორმაციის საფუძველზე, თავდაცვის სამინისტროდან ჩამოსული კომისია მეშვიდე დღეა, რაც აღნიშნულ საკითხში გარკვევას ცდილობს: ”ჯერ არ ვიცი რა როგორ იქნება, არის მოსაზრება, რომ მოსახლეობას კომპენსაცია დაურიგდება. თუმცა, ის რომ ხალხმა იმ მიწის დამუშავება უნდა შეძლოს, რომლებსაც წლების წინ ამუშავებდა, ცალსახად ნათელია”.

ბლიაძის განმარტებით, მაშინ, როცა თავდაცვის სამინისტრომ ეკონომიკის სამინისტროს აღნიშნული მიწების გამოყენება სთხოვა, აქ ბევრი ნაკვეთი საჯარო რეესტრში რეგისტრირებული არ იყო: ”ეკონომიკის სამინისტრომ რეესტრის მონაცემებით გადახედა ამ ტერიტორიას, იქ საკუთრება არ ჩანდა, რადგან როდესაც ეს მიწის ნაკვეთები ხალხს გადაეცა მაშინ გადაცემა შესაბამისი პასპორტებით მოხდა. წლების წინ საკუთრების ასეთი ფორმა არსებობდა. შემდეგ რეგისტრაცია ვინც გაატარა, ის საჯარო რეესტრში ბუნებრივია გამოჩნდა”.

შეგახსენებთ, რომ სოფელ წნისში მცხოვრებლებმა ორფოლოს პოლიგონის მიმდებარე ტერიტორიაზე მდებარე სახნავ-სათესი მიწის დაბრუნება მას შემდეგ მოითხოვეს, რაც სასოფლო ვაუჩერები მიიღეს. ადგილობრივებმა გამგეობაში განცხადება შეიტანეს, გამგეობამ კი წერილი თავდაცვის სამინისტროში გააგზავნა.

[თამუნა უჩიძე, ახალციხე]