ნიკოლ ფაშინიანი სომხეთის პრემიერ– მინისტრად აირჩიეს

ნიკოლ ფაშინიანი სომხეთის პარლამენტმა პრემიერ–მინისტრად დღეს, რვა მაისს აირჩია. ამ პოსტზე მხოლოდ ფაშინიანის კანდიდატურა იყო წარდგენილი.

სომხეთის პრემიერ-მინისტრის პოსტი ვაკანტური 23 აპრილს გახდა, მას შემდეგ რაც სერჟ სარგსიანმა მომიტინგეების მოთხოვნა დააკმაყოფილა და თანამდებობიდან გადადგა.

პირველ მაისს, სომხეთის პარლამენტში, პრემიერ-მინისტრად ნიკოლ ფაშინიანის დანიშვნას მხარი არ დაუჭირეს ყველაზე მეტი მანდატის მქონე, სახელისუფლებო რესპუბლიკური პარტიის დეპუტატებმა. შესაბამისად, ფაშინიანი პარლამენტმა ერთი კვირის წინ პრემიერ-მინისტრად ვერ აირჩია. მაშინ მან მხოლოდ 45 ხმა მიიღო, მისი არჩევის წინააღმდეგ კი 55-მა დეპუტატმა მისცა ხმა. იმისთვის, რომ ნიკოლ ფაშინიანი პრემიერ-მინისტრად აერჩიათ, 53 ხმა იყო საჭირო. საკანონმდებლო რეგულაციების შესაბამისად, პარლამენტს მისი კანდიდატურისთვის კენჭი კიდევ ერთხელ უნდა ეყარა.

შეგახსენებთ, რომ ათწლიანი საპრეზიდენტო მმართველობის შემდეგ სერჟ სარგსიანის უკვე პრემიერ-მინისტრის რანგში დარჩენის საფრთხე სომხეთში პირველად, 23 მარტს ახალგაზრდების მცირე ჯგუფმა გააპროტესტა.

რამდენიმე დღეში სარგსიანი პრემიერ-მინისტრის კანდიდატად უკვე ოფიციალურად დაასახელეს, რასაც ოპოზიციური პარტიების მიერ დაგეგმილი აქციებიც მოჰყვა.

16 აპრილიდან კი სომხეთის სხვადასხვა ქალაქებში, საპროტესტო აქციები დაიწყო, 10 დღიანი საპროტესტო გამოსვლების შემდეგ, სერჟ სარგსიანი გადადგა.

[sknews.ge]