"მშვიდობა ომზე მეტია" - ახალციხეში არჩილ ტატუნაშვილის მიმართ სოლიდარობის აქცია გაიმართება

საპროტესტო აქცია ყველა ქალაქში 18:30 საათზე დაიწყება. ახალციხეში ანტიოკუპაციური აქცია მესხეთის დრამატული თეატრის წინ გაიმართება.

"ამ აქციის ორგანიზების პროცესში მონაწილეობა არ მიუღია არცერთ პოლიტიკურ ორგანიზაციას, არც არასამთავრობო ორგანიზაციებს. ეს არის თავიდან ბოლომდე სამოქალაქო ინიციატივა. პროტესტის მთავარი მიზანი ის არის რაც დატრიალდა ტატუნაშვილის და მისი თანამებრძოლების თავს. რუსეთი დღემდე ახორციელებს ოკუპაციას საქართველოზე", – აცხადებენ აქციის ორგანიზატორები.

დღევანდელ აქციას უერთდება: ბათუმი, ოზურგეთი ფოთი,სენაკი, ზუგდიდი, ქუთაისი,ზესტაფონი, ჭიათურა, გორი, ახალციხე, თელავი და ხულო. აღნიშნულ ქალაქებში აქციების ორგანიზატორები ადგილობრივი თეატრების წარმომადგენლები არიან.

22 თებერვალს, საოკუპაციო რეჟიმმა საქართველოს 3 მოქალაქე - არჩილ ტატუნაშვილი, ლევან ქუტაშვილი და იოსებ პავლიაშვილი ახალგორში დააკავა. 23 თებერვალს კი გავრცელდა ინფორმაცია, რომ არჩილ ტატუნაშვილი გაურკვეველ ვითარებაში გარდაიცვალა. გარდაცვლილის ცხედარი ამ დრომდე არ გადმოუციათ ოჯახისთვის.

ე.წ. სამხრეთ ოსეთის ხელისუფლების განმარტებით, ცხედარს ექსპერტიზა უტარდება.

ოჯახის წევრების აცხადებენ, რომ საოკუპაციო რეჟიმი გადმოსვენებას განგებ აყოვნებს, რათა რეალური ექსპერტიზის ჩატარება და სიკვდილის მიზეზების დადგენა შეუძლებელი გახდეს.

ცხედრის ოჯახისთვის გადმოცემის საკითხში ჩაერთო საქართველოს საპარტიარქოც.

ტატუნაშვილი წარსულში საქართველოს შეიარაღებულ ძალებში მსახურობდა.

[sknews.ge]