10 წლის გოგონას გარდაცვალების მიზეზი ცნობილია

29 მარტს ახალციხის მუნიციპალიტეტში 10 წლის ბავშვი გარდაიცვალა. გარდაცვალების მიზეზი ანაფილაქსიური შოკი აღმოჩნდა, რაც არასწორად გაკეთებულმა ნემსმა გამოიწვია.

სამცხე-ჯავახეთის სასამართლო-სამედიცინო ექსპერტი დავით მერაბიშვილი ამბობს, რომ ოჯახის წევრებმა ბავშვს ნემსი არასწორად გაუკეთეს: ”ანტიბიოტიკი გაუკეთეს, გახდა ცუდად და საავადმყოფოში მოყვანა ვეღარ მოასწრეს. ბავშვს ფილტვების ანთება ჰქონდა და რაღაცა რაციოცეფი სწორედ ამ მიზეზით გაუკეთეს. ბავშვი ამ ნემსის გაკეთების გამო გარდაიცვალა”.

”სამხრეთის კარიბჭე” გარდაცვლილის ოჯახის წევრებს ექსპერტიზის დასკვნის მიღებამდე ესაუბრა. მაშინ ბებიამ და დედამ კომენტარის გაკეთებისგან თავი შეიკავეს, მათ მხოლოდ ის თქვეს, რომ მომხდარში არავის ადანაშაულებდნენ: ”არც ბავშვის ექიმთან გვაქვს რაიმე პრეტენზია”.

იმ პერიოდში ბავშვის ავადმყოფობის გამო ოჯახს ექიმისთვის არ მიუმართავს.

”სამსახურიდან მივლინებით ვიყავი ქალაქიდან გასული. მართლა არაფერი ვიცი ბავშვს რა სჭირდა, ან რა გაუკეთეს და რატომ”, - ამბობს ექიმი და ამატებს, რომ გარდაცვლილს ძალიან ყურადღებიანი ბებია ჰყავს.

მომხდარის შესახებ გამოძიება მიმდინარეობს. დასკვნაზე მუშაობა, რომელიც გამოძიებას უნდა წარედგინოს, მერაბიშვილმა დღეს დაასრულა.

”ყველა საბუთს კიდევ ერთხელ გავგზავნი თბილისში კომისიურ ექსპერტიზაზე, პასუხი იქიდანაც იგივე მოვა”, - გვითხრა მერაბიშვილმა.

[თამუნა უჩიძე, ახალციხე]