პირველკლასელთა რეგისტრაციის მეორე ეტაპი ხვალიდან იწყება

საქართველოს განათლებისა და მეცნიერების სამინისტროს ადმინისტრაციაში პირველკლასელთა რეგისტრაციასთან და ექსტერნის გამოცდებთან დაკავშირებულ განმარტებას აკეთებენ.

პირველკლასელთა რეგისტრაციის მეორე ეტაპი ხვალიდან დაიწყება. რეგისტრაცია ბავშვის მშობელმა/კანონიერმა წარმომადგენელმა სამინისტროს ვებგვერდებზე, ონლაინ რეჟიმში უნდა გაიაროს,ხოლო ზოგადსაგანმანათლებლო დაწესებულებაში მოსწავლის ჩასარიცხად აუცილებელი დოკუმენტები 2013 წლის 21 ივნისიდან 2013 წლის 3 ივლისის ჩათვლით უნდა წარადგინოს.

რეგისტრაციის მესამე ეტაპის ვადად 2013 წლის10 ივლისიდან 2013 წლის18 ივლისის ჩათვლითაა განსაზღვრული. მესამე ეტაპზე რეგისტრაცია განხორციელდება იმ გამოთავისუფლებულ ადგილებზე, სადაც მშობელი/კანონიერი წარმომადგენელი მოსწავლის ჩასარიცხად აუცილებელ საბუთებს განსაზღვრულ ვადებში არ წარადგენს.

შეგახსენებთ, რომ რეგისტრაციის პირველ ეტაპზე ახალციხის სკოლებში 130 პირველკლასელი დარეგისტრირდა.

რაც შეეხება გამოცდების ექსტერნად ჩაბარების წესს, მხოლოდ იმ მე-12 კლასელებს შეეხებათ, რომელთაც 2012-2013 სასწავლო წლის განმავლობაში კონკრეტული საგნისათვის დათმობილი საათების 30% და მეტი აქვთ გაცდენილი.

ამ კატეგორიიის მოსწავლეებმა რეგისტრაცია 2013 წლის 29 აპრილიდან 2 მაისის ჩათვლით შესაბამის საგანმანათლებლო რესურს-ცენტრში უნდა გაიარონ. ექსტერნის გამოცდები 2013 წლის 7 მაისიდან 15 მაისის ჩათვლით ჩატარდება.

[sknews.ge]