”ტრანსპორტელი” საკრებულოსგან ფართის დაბრუნებას ითხოვს

კომპანიის საჩივარი დღეს საკრებულოს სხდომაზე განიხილეს.

”საჩივარი ეხებოდა შპს ”ტრანსპორტელის” საკუთრებაში არსებული 150 კვადრატული მეტრი მიწის ნაკვეთის კვლავ დაბრუნებას, ეს ფართი ახალი აშენებული ბიბლიოთეკის მიმდებარედაა. ეს უნდა ყოფილიყო შუალედური პუნქტი ავტობუსების გაჩერებისთვის”, - განმარტვას შპს ”ტრანსპორტელის” დამფუძნებელი გიორგი ჩიხლაძე.

ახალციხის მუნიციპალიტეტის საკრებულოს იურისტის ირინა ყურმაშვილის განმარტებით, არსებობს ”ქალაქ ახალციხის მერიის დადგენილება”, სადაც მითითებულია, რომ აღნიშნულ შპს-ს რუსთაველის ქუჩაზე 150 კვადრატული მეტრის ფართი გადაეცა, თუმცა, კონკრეტულად რომელი ნომერია მათ საკუთრებაში, დადგენილებაში მითითებული არაა.

შპს ”ტრანსპორტელს” აღნიშნული ფართი გარკვეული მიმართულებით მოძრავი ავტობუსების გაჩერებისთვის უნდა გამოეყენებინა.

”კი გადაეცა სარგებლობის უფლებით, მაგრამ დადგენილებაში ჩადებული იყო პირობა, რომლის თანახმადაც აღნიშნულ ტერიტორიაზე სალარო უნდა ჩაედგათ”, - განმრტავს ირინა ყურმაშვილი და ამატებს, რომ ვინაიდან აღნიშნულმა კომპანიამ განკარგულებით გათვალისწინებული პირობები ვერ შეასრულა, დადგენილება ძალადაკარგულად გამოცხადდა, - ამის შემდგომ საქმე სასამართლომდე მივიდა. სასამართლომ გადაწყვეტილება ვერ მიიღო და ჩვენ დაგვავალა, რომ ახალი მტკიცებულებები მოგვეძიებინა და გადაწყვეტილება მიგვეღო”.

ახალციხის მუნიციპალიტეტის საკრებულოს გადაწყვეტილებით შპს ”ტრანსპორტელს” შესაბამისი დოკუმენტაციის წარმოსადგენად ერთი თვის ვადა მიეცა.

”საკრებულომ მიიღო გადაწყვეტილება, რომ თუ მფლობელი რაიმე დოკუმენტაციას წარმოგვიდგენს, რომ დადგენილების პირობებს აკმაყოფილებს და შესრულებული აქვს გარკვეული ვალდებულებები, ამ შემთხვევაში საკრებულო იმსჯელებს, გადაუგზავნის გამგეობას და გამგეობა ალტერნატიულ ფართს გამოყოფს”, - ამბობს ახალციხის მუნიციპალიტეტის საკრებულოს თავმჯდომარის მოადგილე მალხაზ ასპანიძე.

[თამარ თოთაძე, ახალციხე]