ახალციხეში წითელას ვირუსზე 100-მდე ბავშვი აიცრება

ააიპ ახალციხის საზოგადოებრივი ჯანმრთელობის დაცვის ცენტრის ხელმძღვანელის ფატი ხაბულიანის თქმით, წითელას შემთხვევები მუნიციპალიტეტში არ დაფიქსირებულა, თუმცა იმის გამო, რომ საშიშროება არსებობს, პრევენციის მიზნიტ ვაქცინაცია ტარდება.

შეგახსენებთ, რომ წითელას ვირუსის საგრძნობლად მატების გამო მედიკოსებმა მიიღეს გადაწყვეტილება, ჩატარდეს საყოველთაო სავალდებულო აცრა. ბოლო მონაცემებით, საქართველოში წითელას 1433 შემთხვევაა გამოვლენილი. მათგან თითქმის 1043-მდე შემთხვევა თბილისში დაფიქსირდა.

აღნიშნულის მიზეზად 2008 წელს წითელას იმუნიზაციის ჩაშლას ასახელებენ.
გასულ წელს ქვეყანაში წითელას 31 შემთხვევა იყო აღრიცხული. ზოგადად ბოლო წლებში კი წითელას შემთხვევების რაოდენობა 40-60 ერთეულს არ აღემატებოდა.

შემთხვევების მატების გამო დაავადებულებთან კონტაქტში მყოფი 6 თვიდან 30 წლამდე ასაკის პირების, ასევე 1-7 წლამდე პატარების უფასო სავალდებულო ვაქცინაცია მიმდინარეობს.

წითელას დაავადებას ცხელება, მე-4 - მე-5 დღეს კი გამონაყარი ახასიათებს.
წითელას გადატანის ან ვაქცინაციის შემთხვევაში ადამიანს დაავადებაზე მყარი იმუნიტეტი უყალიბდება.

[თინათინ ზაზაძე, ახალციხე]