მუნიციპალიტეტებმა ნარჩენების მართვის 5- წლიანი გეგმა უნდა შეიმუშავონ

შეხვედრა სამცხე–ჯავახეთის სამხარეო ადმინისტრაციაში დღეს, 22 ივნისს გაიმართა, რომელსაც გარემოსა და ბუნებრივი რესურსების დაცვის სამინისტროს წარმომასდგენლებთან ერთად, მინისტრის მოადგილე ეკატერინე გრიგალავა ესწრებოდა.

სტუმრებმა, სამცხე–ჯავახეთის შვიდივე მუნიციპალიტეტის ხელმძღვანელ პირს ნარჩენების მართვის კოდექსით გათვალსიწინებული ის ვალდებულებები გააცნეს, რომელიც ევროკავშირთან თანამშრომლობით შემუშავდა და ასოცირების ხელშეკრულება ითვალსიწინებს.

„კოდექსის მიხედვით, მუნიციპალიტეტებს 5-წლიანი გეგმის შედგენის ვალდებულებაა აქვთ და ამაზე მუშაობა მალევე უნდა დაიწყონ. დღევანდელ შეხვედრაზე სწორედ ის უფლებამოსილებები და ვალდებულებები განვიხილეთ, რაც მუნიციპალიტეტებს აკისრიათ", –განაცხადა შეხვედრის დასრულების შემდეგ გარემოს დაცვის მინისტრის მოადგილემ ეკატერინე გრიგალავამ.

სამინისტროს წარმომადგენლების თქმით, მუნიციპალური ნარჩენების მართვის გეგმა უნდა შეესაბამებოდეს 2016 წლის 1 აპრილის საქართველოს მთავრობის №160 დადგენილებით დამტკიცებულ ,,ნარჩენების მართვის 2016-2030 წლების ეროვნულ სტრატეგიასა“ და ,,ნარჩენების მართვის 2016-2020 წლების ეროვნულ სამოქმედო გეგმას“.

„ეს ის პროექტია, რომელსაც დიდი მნიშვნელობა ექნება რეგიონისათვის და ჩვენ მას მხარს დავუჭერთ და განხორციელებაში მივიღებთ მონაწილეობას“,– ამბობს სამცხე–ჯავახეთის გუბერნატორი აკაკი მაჭუტაძე.

მუნიციპალური ნარჩენების მართვის გეგმების კოდექსით დადგენილ ვადაში, 2017 წლის 31 დეკემბრამდე შემუშავებისა და მისი ეფექტიანად განხორციელების მიზნით, მუნიციპალიტეტებში სამუშაო ჯგუფები შეიქმნება.

გარემოს დაცვის სამინისტრო მსგავსი სახის შეხვედრებს თვითმმართველობის წარმომადგენლებთან საქართველოს ყველა რეგიონში მართავს.



[ლუბა გიორგაძე, ახალციხე]