ბორჯომში სასწრაფო დახმარების ცენტრი შენდება

ბორჯომში, ლიკანის დასახლებაში სასწრაფო დახმარების სამსახური წლების განმავლობაში კერძო მესაკუთრის ფართში იყო განთავსებული, სამედიცინო პერსონალს კი არასათანადო პირობებში უწევდა მუშაობა.

„ადგილობრივი მუნიციპალიტეტის ერთ-ერთი პრიორიტეტი იყო პროფესიული საქმიანობის განხორციელებისათვის ექიმებს ჰქონოდათ მაღალი სტანდარტებისა და შესაბამისად აღჭურვილი გარემო. შედგა პროექტი, რომელის მიხედვითაც აშენდება ერთსართულიანი შენობა, სამედიცინო პერსონალისათვის გათვალისწინებული იქნება როგორც სამუშაო, ასევე მოსასვენებელი ოთახები“, - ამბობს ბორჯომის მუნიციპალიტეტის გამგებელი დიმიტრი ყიფიანი.

ამ დროისთვის ლიკანში საძირკვლისთვის საჭირო გრუნტის მოსამზადებელი სამუშაოები მიმდინარეობს. შენობის კეთილმოწყობასთან ერთად მოეწყობა მიმდებარე ტერიტორიაც.

ახალ შენობაში სასწრაფო დახმარების 48 თანამშრომელი იმუშავებს.

სამშენებლო სამუშაოებისათვის ადგილობრივი მუნიციპალიტეტის ბიუჯეტიდან 114 770 ლარი გაიხარჯება. პროექტი ოქტომბერში დასრულდება.

[sknews.ge]