ახალდაბაში გზის ჩაკეტვის შემდეგ გამგეობა პრევენციულ ღონისძიებებზე მუშაობს

ახალდაბაში, ძლიერი წვიმის შედეგად ახალციხე–თბილისის ცენტრალური მაგისტრალის ჩაკეტვა ნაღვარევის ღელის დაგუბებამ გამოიწვია. ღელეს მოყოლილმა ქვა–ღორღმა და მორებმა წყალი აღარ გაატარა და გზის სავალ ნაწილზე გადავიდა.

ბორჯომის მუნიციპალიტეტის გამგეობაში აცხადებენ, რომ ამ დროისთვის ნაღვარევის ღელეზე პრევენციული ღონისძიებების გატარების გეგმაზე მუშაობენ.

„სწავლობენ იმ ადგილს იმისთვის, რომ მომავალში მსგავსი რამ აღარ განმეორდეს და ღელე აღარ დაგუბდეს“, – აცხადებენ ბორჯომის მუნიციპალიტეტის გამგეობის საზოგადოებასთან ურთიერთობის სამსახურში.

რაც შეეხება გზის რეაბილიტაციას, გამგეობაში ამბობენ რომ ეს საგზაო დეპარტამენტის პრეროგატივაა: „ადგილობრივების მხრიდან კი სტიქიის გამო რაიმე განცხადება არ შემოსულა“.

შეგახსენებთ, რომ 10 ივნისს საღამოს დაახლოებით 2 საათის განმავლობაში ახალციხე–თბილისის ცენტრალური მაგისტრალი ჩაკეტილი იყო. გზაზე მოსული ღვარცოფის გამო გადაადგილება შეუიძლებელი იყო.

[თამუნა უჩიძე, ბორჯომი]