ახალციხის სოფელ პამაჯში 'ატმარტინას' მწარმოებელი ბიზნესმენის სახლი გაქურდეს

მზესუმზირა „ატმარტინას“ მწარმოებლის მამა, მარტინ ბაბოიანი ვარაუდობს, რომ ქურდობა მაისის ბოლო რიცხვებში მოხდა. მისი თქმით, იმ პერიოდში იგი სომხეთში, ერევანში იმყოფებოდა, საქართველოში 29 მაისს დაბრუნდა და სახლში მისულს ტელევიზორი, მიკროტალღური ღუმელი, ძვირადღირებული ალკოჰოლური სასმელები და 5000 დოლარის ოდენობით ფულადი თანხა, რომელიც საფულეში მართვის მოწმობასთან ერთად იყო, წაღებული დახვდა: „რომ შემოვედი მთელი ტანსაცმელი, ავეჯი და ყველაფერი, რაც კი შეხვედრიათ, თავდაყირა დამხვდა. ვნახე, რომ უკანა კარები ღია იყო, ეტყობა წინა კარებიდან შემოვიდნენ და უკანა გასასვლელიდან გავიდნენ".

მარტინ ბაბოიანის თქმით, სახლის ფანჯრები და კარები დაზიანებული არ არის. ოჯახის წევრებს ეჭვი ამ ეტაპზე არც არავისზე აქვთ.

„მსგავსი შემთხვევა არასოდეს ყოფილა, არც ვიცი ვის შეიძლება გაეკეთებინა. ძირითადად ერევანში ვცხოვრობ და ამ დროს ჩამოვდივარ ხოლმე საქართველოში“, – ამბობს მარტინ ბაბოიანი.

ბიზნესმენის სახლის ქურდობაში ბრალდებული სამართალდამცველებს ჯერ არ დაუკავებიათ. შსს–ში განმარტავენ, რომ ძიება 177–ე, ქურდობის მუხლით დაიწყო და ბრალდებულების დასაკავებლად ინტენსიური სამძებრო სამუშაოები მიმდინარეობს.



[ლუბა გიორგაძე, ახალციხე]