კულტურის დაწესებულებათა გაერთიანების დირექტორის წინააღმდეგ შეტანილი სარჩელი სააპელაციომ არ განიხილა

ცენტრალური ბიბლიოთეკის ყოფილი დირექტორი, სააპელაციო სასამართლოსგან ახალციხის რაიონული სასამართლოს მიერ, 2016 წლის 28 დეკემბერს გამოტანილი გადაწყვეტილების გაუქმებას ითხოვდა.

შეგახსენებთ, სამოქალაქო დავა ქეთევან მელიქიძესა და მის ზემდგომს, ზაირა კელაპტრიშვილს შორის, გასული წლის შემოდგომით დაიწყო. ქეთევან მელიქიძე სასამართლოში იმ აქტის ბათილად ცნობას ითხოვდა, რომლის თანახმადაც მას სამსახურში გაფრთხილება მისცეს.

გაფრთხილება კი ბიბლიოთეკის ყოფილი დირექტორს ზაირა კელაპტრიშვილმა სამუშაო პროცესის მიტოვების გამო გამოუცხადა.

2016 წლის 28 დეკემბერს, ახალციხის რაიონული სასამართლოს მოსამართლე გიორგი ლონდარიძემ ქეთევან მელიქიძის სამოქალაქო სარჩელი არ დააკმაყოფილა. ეს გადაწყვეტილება გაასაჩივრა სააპელაციო სასამართლოში ქეთევან მელიქიძის ადვოკატმა ეკა აბაშიძემ.

ახალციხის რაიონული სასამართლოს მიერ გადაწყვეტილების გამოცხადებიდან მალევე, ზაირა კელაპტრიშვილმა, ქეთევან მელიქიძეს ხელშეკრულება აღარ გაუგრძელა.

„სააპელაციომ არ განიხილა საქმე. რაც ზეპირად ვიცი, რადგან ქეთევან მელიქიძე სამსახურიდან გათავისუფლებულია, საქმის განხილვის იურიდიული უფლება არ ჰქონდა, რაც პროცედურული დარღვევაა. ამიტომ, წერილობით ჩამბარდება თუ არა გადაწყვეტილება, გავასჩივრებთ“, – ამბობს ქეთეან მელიქიძის ადვოკატი ეკა აბაშიძე.

[ლუბა გიორგაძე, ახალციხე]