ახალციხის მერიაში გამოცხადებულ კონკურსზე 147 განაცხადი შევიდა

ახალციხის მერიაში კონკურსანტების მიერ შეტანილი დოკუმენტების გადარჩევის პროცესი მიმდინარეობს.

თვითმმართველობაში დასაქმების მსურველი რამდენია, ეს ჯერ ცნობილი არ არის, რადგან შესაძლოა, ერთ კონკურსანტს განაცხადი არა მხოლოდ ერთ პოზიციაზე ჰქონდეს წარდგენილი.

„ზოგ პოზიციაზე ხუთი და მეტი განაცხადია შემოსული, გადარჩევა რომ დასრულდება ზუსტი რაოდენობა გვეცოდინება“, – აცხადებენ ახალციხის მერიაში.

ყველაზე მეტი, 32 განაცხადი ინფრასტრუქტურის სამსახურში საქმის წარმოების საკითხებში მთავარი სპეციალისტის პოზიციაზე შევიდა, ხოლო 28 განაცხადი მატერიალურ ტექნიკურ საკითხებში სპეციალისტის პოზიციაზე.

შეგახსენებთ, რომ ახალციხის მერიაში ვაკანტურ 13 პოზიციაზე კონკურსი 6 მარტს გამოცხადდა. განაცხადების მიღების ბოლო ვადა კი 15 მარტი იყო.

[ლუბა გიორგაძე, ახალციხე]