დაბა ბაკურიანში, ერთ ღამეში, რამდენიმე ობიექტი გაქურდეს

დაბა ბაკურიანის რესტორანისა და სასტუმრო „ანგას“ მეპატრონე „სამხრეთის კარიბჭესთან“ ამბობს, რომ ქურდობა დაახლოებით ღამის სამი საათისათვის მოხდა. ორი შეიარაღებული პირი რესტორანში სამზარეულოს კარიდან შევიდა და 400 ლარი, სიგარეტები და ალკოჰოლური სასმელი წაიღო.

„მომსახურე პერსონალს მაღლა ეძინა და არაფერი გაუგია, ვიღაცას 112-ზე დაურეკავს და მე რომ მივედი, უკვე სამართალდამცველები დამხვდნენ. კიდევ კარგი სასტუმროშიც არ ავიდნენ. ვიცი, რომ ადგილობრივები არ იყვნენ ეს ბიჭები“,-გვეუბნება დაზარალებული თამაზ გაავა.

მისივე თქმით, იმ ღამეს ბაკურიანის ცენტრში, სადაც პოლიციის რაიონული სამმართველოც მდებარეობს, სხვა ობიექტები: აფთიაქი, მაღაზია და ბილაინის ოფისიც გაიქურდა.

ადგილობრივები ჯგუფურ ქურდობაზე საუბრობენ. სასტუმრო და რესტორან „ანგას“ ყოფილი მეპატრონის თქმით, ქურდობაში, რუსთაველი 6-დან 22 წლამდე ახალგაზრდები მონაწილეობდნენ, რომლებიც ბაკურიანში კრიმინალური ავტორიტეტის მქონე პირმა ჩაიყვანა.

„ესე ამბობენ, ვიღაცა ქურდი ყოფილაო, „პაპას“ ეძახიან, რუსთავიდან შეიარაღებული ახალგაზრდები ჩამოუყვანია და ამ ობიექტების გაქურდვა დაუვალებია, თურმე ქალაქის ცენტრში დადიოდნენ და რომელი ობიექტიც შეხვდებოდათ, იმას ქურდავდნენ“, - ამბობს სასტუმრო და რესტორან „ანგას“ ყოფილი მეპატრონე.

მისივე ინფორმაციით, კრიმინალური ავტორიტეტის მქონე პირის ვინაობა ვერ დაადგინეს და არც დაკავებულია.

ადგილობრივებისაგან განსხვავებით, შსს-ში ამბობენ, რომ 13 იანვარს დაბა ბაკურიანში მხოლოდ ორი ობიექტი, აფთიაქი და სასტუმრო გაიქურდა.

რა ზარალი ნახეს ობიექტებმა, გამოძიების ინტერესებიდან გამომდინარე შსს-ში არ საუბრობენ, თუმცა ამბობენ, რომ საქმე გახსნილია და დანაშაულში მხილებული არსრულწლოვანების სისხლის სამართლის პასუხისმგებლობის საკითხი დადგება. ძიება სსკ-ს 177-ე მუხლით მიმდინარეობას, რაც ქურდობას გულისხმობს.

[ლუბა გიორგაძე, ბორჯომი]