სომეხთა სამოციქულო ეკლესია ქრისტეშობას აღნიშნავს [photo]

გრიგოლ განმანათლებლის სახელობის სომხურ ეკლესიაში ლოცვა ახალციხისა და ბორჯომის სათვისტომოების სულიერმა მოძღვარმა, ბერმა ჰაკობ სააკიანმა აღავლინა. ლოცვის დასრულების შემდეგ მორწმუნეები სახლში ანთებული სანთლებით დაბრუნდნენ.

შობის წინა დღეს “ჩრაგაუიცი“ (ლამპრების ანთება) ეწოდება და 5 იანვარს აღინიშნება. საღამოს ეკლესიებში ლიტურგია ტარდება, მორწმუნეებს ეკლესიიდან სახლში საშობაო ცეცხლი მიაქვთ, რაც ბეთლემის ვარსკვლავის სიმბოლოა.

ხვალ, 6 იანვარს ეკლესიაში საშობაო ლიტურგია ჩატარდება, რის შემდეგაც წყალს აკურთხებენ და მრევლს დაურიგებენ. წყლის კურთხევა მდინარე იორდანეში ქრისტეს ნათლობის სიმბოლოა.

7 იანვარს კი სომეხი მოსახლეობა მერელოცს, ანუ მიცვალებულთა ხსენების დღე აღინიშნავს. საღვთო ლიტურგიის შემდეგ ეკლესიებში მიცვალებულთა სულების განსვენებისთვის ლოცულობენ და საფლავებზე გადიან.

შობისწინა კვირა — 30 დეკემბრიდან 5 იანვრის საღამომდე — სომეხი მოსახლეობისთვის მარხვის კვირად მიიჩნევა. ეკლესიებში საშობაო ლიტურგიის აღვლენის შემდეგ მთავრდება. მორწმუნეები ერთმანეთს ესალმებიან სიტყვებით: „ქრისტე იშვა და გამოგვეცხადა! ნეტარ არს ქრისტეს გამოცხადება!“

შობის დღესასწაულზე მაგიდაზე აუცილებლად უნდა იყოს თევზი (ქრისტიანობის უძველესი სიმბოლო) და ტკბილი ფლავი ქიშმიშითა და ჩირით (ბრინჯი მთელი კაცობრიობის სიმბოლოა, ქიშმიში კი რჩეულების). საშობაო სუფრის აუცილებელი ატრიბუტია ასევე წითელი მშრალი ღვინო. ზოგიერთ ოჯახში მიღებულია ასევე ვაზის ფოთოლში გახვეული ტოლმა და მწვანილი, ძირითადად ისპანახი.

შობის დღესასწაული სომეხი მოსახლეობისთვის 13 იანვრამდე გრძელდება.















[თინათინ ზაზაძე, ახალციხე]