2017 წელს ახალციხის თემში ,რეგიონული ფონდიდან’ ხუთი პროქტი დაფინანსდება

ახალციხის თემის საკრებულომ 2017 წელს დაგეგმილი ინფრასტრუქტურული პროექტების სამოქმედო გეგმა მოიწონა. დეპუტატები რეგიონში განსახორციელებელი პროექტების ფონდიდან მუნიციპალიტეტისათვის გამოყოფილი თანხის ოდენობასა და შესასრულებელ სამუშაოებს 19 დეკემბერს გაეცნენ.

რეგიონებში განსახორციელებელი პროექტების თანხა სოფლების მიხედვით ასე გადანაწილდა:

1.წყრუთი – ანის საავტომობილო გზის რეაბილიტაცია, ( მონაკვეთი სოფელ ანის ცენტრამდე განისაზღვრა) – 755 000 ლარი;
2. ფერსა–გიორგიწმინდა – მუგარეთის საავტომობილო გზის რეაბილიტაცია – 608 000 ლარი;
3. ხეოთი– ურაველის საავტომობილო გზის რეაბილიტაცია– 393 000 ლარი;
4. ვალეში, მეგობრობის ქუჩის რეაბილიტაცია – 344 000 ლარი;
5. აწყურში სათავე–ნაგებობებისა და მაგისტრალური მილსადენის მოწყობის სამუშაოები –371 000 ლარი;

გამგეობის ინფრასტრუქტურის სამსახურის უფროსი მრჩეველის, ნოდარ ბალახაშვილის განმარტებით, პირველ ეტაპზე ცენტრალური ბიუჯეტიდან ახალციხის თემისთვის 2 900 000 ლარით განისაზღვრა, თუმცა შემდეგ 2 471 000 ლარამდე შემცირდა.

,,აგვისტოში საკრებულოს სხდომაზე 8 პროექტი გვქონდა მოსაწონებლად გამოტანილი. მათი საერთო ღირებულება 2 მილიონ 900 ათასს შეადგენდა, თუმცა სამწუხაროდ, ეს თანხა შეგვიმცირდა. ეს იმან გამოიწვია, რომ აქამდე მხოლოდ ერთი, რეგიონში განსახორიცელებელი პროექტების ფონდი იყო, ახლა მას გამოეყო კიდევ ერთი–მთის ფონდი შესაბამისად თანხა განაწილდა“– განმარტა ნოდარ ბალახაშვილმა.

ახალციხის გამგებლის ზაზა მელიქიძის განმარტებით, პროექტები, რომლებიც რეგიონული განვითრების ფონდის სახსრებით თავდაპირველად დაიგეგმა, განსახორიცელებელი არ დარჩება.

„მაღალმთიანობის მიმართულებით ცენტრალური ბიუჯეტიდან დაგვემატება დაახლოებით 500 – 600 ათასი ლარი და ის ყველა პროექტი, რომელიც დაგეგმილი იყო შესრულდება“ – ამბობს ახალციხის გამგებელი.

გარდა აღნიშნულისა, ახალციხის გამგეობა დაფინანსებას მუნიციპალური განვითარების ფონდიდანაც ელოდება.

მათი ინფორმაციით, ამ ეტაპზე, წარდგენილია დაახლოებით 3 მილიონის ღირებულების ინფრასტრუქტურული პროექტი– ,,ეს იქნება მსხვილი პროექტები დაახლოებით თითო მილიონის ფარგლებში, ამ ეტაპზე მიმდინარეობს პროექტების კორექტირება“– განმარტავენ თვითმმართველობაში.

[თაკო ფეიქრიშვილი, ახალციხე]