თურქეთში რუსეთის ელჩი, ანდრეი კარლოვი მოკლეს

შეიარაღებულმა მამაკაცმა 62 წლის ელჩს უკნიდან იმ დროს ესროლა, როდესაც ის სიტყვით გამოსვლას ასრულებდა.

“ჩვენ ვკვდებით ალეპოში, თქვენ აქ მოკვდებით”, - დაიყვირა თავდამსხმელმა და რუსეთის ელჩს ხუთი ტყვია ესროლა.

HaberTurk-ის ინფორმაციით, მამაკაცი, რომელმაც რუსეთის ელჩი მოკლა, თურქეთის პოლიციის ყოფილი თანამშრომელი, მევლუთ მერთ ალტინტაშია. ის პოლიციიდან ივლისის პუტჩის შემდეგ გააგდეს. გამოცემის ცნობით, მევლუთ მერთ ალტინტაში ფეთჰულა გიულენის ტერორისტული ორგანიზაციის წევრი იყო.

ამავდროულად, ტელეკომპანია „NTV“ ავრცელებს ინფორმაციას, რომ დამნაშავე საგამოფენო სივრცეში როგორც პოლიციელი შეიპარა, სადაც რუსეთის ელჩი სიტყვით გამოდიოდა. ვარაუდობენ, რომ მის მიერ წარმოდგენილი დამადასტურებელი საბუთი, შესაძლოა, ყალბი ყოფილიყო.

გავრცელებული ინფორმაციით ტერაქტი მიმართული იყო ელჩის წინააღმდეგ, რადგან გასროლის შემდეგ, თავდამსხმელმა ღონისძიებაზე დამსწრეთ საშუალება მისცა, საგამოფენო სალონის შენობა დაეტოვებინათ.

ადამიანი, რომელმაც თურქეთში რუსეთის ელჩზე ანდრეი კარლოვზე თავდასხმა განახორციელა, ლიკვიდირებულია. თურქული ტელეკომპანია „NTV“-ს ინფორმაციით, მისი ლიკვიდაცია საპოლიციო შტურმის შედეგად განხორციელდა.

რუსეთის საგარეო საქმეთა სამინისტრომ მომხდარს ტერაქტის კვალიფიკაცია მიანიჭა.

"სიენენის" თურქული ოფისის ინფორმაციით, დაშავებულია კიდევ რამდენიმე პირი. ანდრეი კარლოვი თურქეთში რუსეთის ელჩად 2013 წელს დაინიშნა.

[sknews.ge]