ორი აფეთქება სტამბოლში - არიან დაშავებულებიც

პირველი აფეთქება სტამბოლის ცენტრში, ტაქსიმის მოედნის მიმდებარედ მდებარე სტადიონ "ბეშიქტაშის" სიახლოვეს, ხოლო მეორე მაჩკას პარკთან მოხდა.

ტერორისტებმა ასაფეთქებელი მოწყობილობა სტადიონის მახლობლად მანქანიდან ისროლეს.თურქეთის შინაგან საქმეთა მინისტრის სულეიმან სოილუს განცხადებით დამნაშავეების თავდასხმის ობიექტი პოლიციის ავტობუსი იყო.

შინაგან საქმეთა მინისტრის განცხადებით,მაჩკას პარკთან მომხდარი მეორე აფეთქება, სავარაუდოდ, თვითმკვლელმა ტერორისტმა განახორციელა. აღნიშნულის შესახებ CNN Türk იუწყება. ადგილობრივი მედიის ინფორმაციით, აფეთქების შედეგად, რომელიც საფეხბურთო სტადიონის რაიონში მოხდა, დაშავებულთა რიცხვი 38-ს აღწევს.

თურქულენოვანი გამოცემა "ალ ჯაზირა" ინფორმაციას 15 დაღუპული პოლიციელის შესახებ ავრცელებს, თუმცა ეს ინფორმაცია ამ დრომდე ოფიციალურად არ დადასტურებულა.

სტამბოლში დღეს მომხდარ აფეთქებას თურქეთის ხელისუფლებამ უკვე უწოდა ტერორისტული აქტი.

საქართველოს საგარეო საქმეთა სამინისტროს ცნობით, სტამბოლის ისტორიულ ცენტრში მომხდარ აფერთქებასთან დაკავშირებით, გენერალურ საკონსულოში მოქმედებს ცხელი ხაზი: (+90 541) 818 44 00, ასევე 24-საათიანი ცხელი ხაზი მოქმედებს საგარეო საქმეთა სამინისტროს საკონსულო დეპარტამენტში: (+995 32) 294 50 50.

სამინისტროს ცნობით, სტამბოლში საქართველოს გენერალური საკონსულო მუდმივ კავშირზეა თურქეთის საგანგებო სიტუაციებზე პირველადი რეაგირების ჯგუფთან. თურქული მხარე ამ ეტაპზე დაღუპულთა და დაშავებულთა შორის საქართველოს მოქალაქეების არსებობას არ ადასტურებს.

[sknews.ge]