ახალციხეში სწრაფი კვების ობიექტები იშვიათად მოწმდება

ბოლო ორი თვეა ახალციხის ცენტრალური ქუჩების მახლობლად, რამდენიმე სწრაფი კვების ობიექტი და საშურმე ამოქმედდა. ობიექტის მფლობელები ამბობენ, რომ ყველა ის პირობა, რაც მსგავსი ობიექტის მუშაობისთვისაა საჭირო, დაცული აქვთ.

- ’საკვები პროდუქტი ყოველდღიურად განახლებადია და ჯანმრთელობისთვის არანაირ საფრთხეს არ წარმოადგენს’, - გვეუბნება ერთ-ერთი ობიექტის მფლობელი არზუმან თათევოსიანი.

საშაურმეს მფლობელი მალხაზ თავაძე ამბობს, რომ სანიტარულ ნორმებს იცავს, პროდუქტს ყოველდღიურად ანახლებს და შესაბამისად, არც უკმაყოფილო კლიენტები ჰყოლია და არც მოწამვლის შემთხვევები ჰქონია.

მოწამვლის ფაქტებზე არც მომხმარებლები საუბრობენ.

- ’თითქმის ყოველდღე ვსტუმრობ სწრაფი კვების ობიექტს, რადგან ვიცი, რომ აქ შეძენილი საკვები საღი პროდუქტებისგან მზადდება’, - გვეუბნება ნათია ქეშეშევი.

იგივეს ამბობს მარიამ კაპანაძე: ’მე და ჩემი მეგობრები კვირაში სამჯერ მაინც ვსტუმრობთ და არანაირი პრობლემა არ გვქონია’.

სურსათის უვნებლობის, ვეტერინარიისა და მცენარეთა დაცვის ეროვნული სამსახურის ახალციხის რაიონული სამმართველოში გვიხსნიან, რომ მათი სამსახური ამ ეტაპზე ამოწმებს, რეგისტრირებული არიან თუ არა მსგავსი ობიექტები ბიზნეს ოპერატორებად. საქართველოს კანონმდებლობით დადგენილი წესის და პირობების შესაბამისად, ყველა ობიექტის მეპატრონე, რომლის საქმიანობაც დაკავშირებულია სურსათის\ცხოველის საკვების წარმოებასთან, გადამუშავებასთან ან დისტრიბუციასთან, ვალდებულია ბიზნეს ოპერატორად დარეგისტრირდეს.

სურსათის უვნებლობის, ვეტერინარიისა და მცენარეთა დაცვის სამსახურის პრესსამსახურის უფროსი ვერიკო გულუა გვიხსნის, რომ ვინც არ დარეგისტრირდება, დაჯარიმდება. ახალციხეში ჯერ არავინ დაუჯარიმებიათ.

რაც შეეხება მსგავსი ობიექტების სანიტარულ შემოწმებას, ვერიკო გულუა გვიხსნის, რომ ახალციხეში სწრაფი კვების ობიექტების შემოწმებას პერმანენტული ხასიათი არ აქვს: ’ზოგადად, მსგავს დაწესებულებებს მთელი საქართველოს მასშტაბით ვამოწმებთ. მაგრამ, რეგიონებში ამას პერმანენტული ხასიათი არ აქვს. ამ ეტაპზე მზადდება ცვლილებები, რაც საშუალებას მოგვცემს მთელი ქვეყნის მასშტაბით კონტროლი სისტემატურად განხორციელდეს’.

გულუას თქმით, ხშირია შემთხვევები, როცა ობიქტის მეპატრონეები, სურსათის მწარმოებლები და რეალიზატორები, არ იცავენ სანიტარულ ნორმებს, ამიტომ მათ წინააღმდეგ სხავადასხვა სახის ადმინისტრაციული ჯარიმები მოქმედებს, რომელიც კაკონში ცვლელებების შეტანის შემდეგ უფრო გამკაცრდება.

[ნინო გოგოლაძე, ახალციხე]