რეგიონების ფონდიდან გადარიცხული თანხებით ახალციხე მეორე ადგილზეა

’რაბათის უბნის’ რეაბილიტაცია 2012წლის მსხვილ პროექტებში მე-2 ადგილზეა

ინფორმაციას საჯარო ინფორმაციის მონაცემთა ბაზა (IDFI) აქვეყნებს. IDFI-ს კვლევაში, ”რეგიონებში განხორციელებული სპეციალური ტრანსფერები წინა საარჩევნო პერიოდში”, რომელიც ”ფონდი ღია საზოგადოება საქართველოს მხარდაჭერით” მომზადდა, ნათქვამია, რომ აღნიშნული თანხის გადარიცხვა ქ. ახალციხის ისტორიული ნაწილის (რაბათის უბანი) სარეაბილიტაციო სამუშაოებისა და მასთან დაკავშირებული სხვა ხარჯებითაა განპირობებული.

- ”რაბათის უბნის რეაბილიტაციისთვის თანხები გამოიყო საქართველოს მთავრობის N15, 04.01.12 (23 000 000 ლარი) და N1310, 06.07.12 ( 5 500 000 ლარი) განკარგულებებით. საწყის ეტაპზე N15, 04.01.12 განკარგულებით გამოიყო, 9 000 000 ლარი, რომელიც როგორც ჩანს შემდგომი ცვლილებებით 23 000 000 ლარამდე გაიზარდა”, - ნათქვამია კვლევაში.

დეტალურ ხარჯთაღრიცხვა, რაში დაიხარჯა აღნიშნული თანხა, შეგიძლიათ იხილოთ დოკუმენტში, რომელიც IDFI-მ ახალციხის მუნიციპალიტეტის გამგეობიდან მიიღო.

საქართველოს რეგიონებში განსახორციელებელი პროექტების ფონდიდან გამოყოფილი თანხის სიდიდით ახალციხეს ბათუმი უსწრებს. 2012 წლის 9 თვის განმავლობაში ყველაზე დიდი თანხა (40 000 000 ლარი) გამოიყო საქართველოს მთავრობის 2012 წლის 12 აპრილის N660 განკარგულებით, რომელიც უკავშირდება „Batumi Tawer“- ის მშენებლობის პროექტის ნაწილობრივ დაფინანსებას.

- ”2012 წლის 9 თვის განმავლობაში ხსენებული პროექტების დაფინანსებაზე გაცემული მთავრობის განკარგულებები ეტაპობრივად განიცდიდა ცვლილებებს. მთავრობის განკარგულების თარიღისა და ნომრის ცვლილების გარეშე ხდებოდა განკარგულებაში გამოყოფილი თანხის ზრდა, რაც გაუგებარს ხდიდა კონკრეტული თარიღით და ნომერით გამოცემული განკარგულებით რა თანხის გამოყოფა მოხდა მთავრობის მიერ”, - ნათქვამია კვლევაში.

[ნინო ნარიმანიშვილი, ახალციხე]