27 ოქტომბერი აფხაზური ენის დღეა

საქართველოს სახალხო დამცველის ინფორმაციით, მსოფლიოში 6500-ზე მეტ ენას ასახელებენ, რომელთა უმრავლესობაც, იუნესკოს მონაცემებით, გაქრობა ემუქრება, მათ შორის 2011 წლიდან სამწუხაროდ აფხაზური ენაც აღმოჩნდა.

"საქართველოს კანონმდებლობით და საერთაშორისო სამართლის ნორმებით საქართველოს ტერიტორიაზე არსებული გაქრობის საფრთხის წინაშე მყოფი ყველა ენის, მათ შორის აფხაზური ენისა და კულტურული მემკვიდრეობის დაცვის, განვითარების და პოპულარიზაციის ვალდებულება საქართველოს სახელმწიფოს ეკისრება. მიუხედავად მრავალი შემაფერხებელი გარემოებისა, ვფიქრობ, უფრო მეტი კონკრეტული აქტივობების განხორციელება არის შესაძლებელი აფხაზური ენის გადარჩენა-განვითარებისთვის. სასურველია, აფხაზებით კომპაქტურად დასახლებულ ადგილებში და იმ ტერიტორიებზე სადაც ასეთი მოთხოვნა იქნება, ხელი შეეწყოს აფხაზური ენის სწავლებას, ასევე განხორციელდეს სხვადასხვა სახის პროგრამები აფხაზური ენის დაცვისა და პოპულარიზებისთვის", – ნათქვამია სახალხო დამცველის დრევანდელ განცხადებაში.

სახალხო დამცველის აპარატის ცნობით, სახალხო დამცველის ოფიციალურ ვებგვერდს სამუშაო ენებს აფხაზური ენაც დაემატა და ომბუდსმენის აპარატის საქმიანობა რეგულარულად უკვე აფხაზურ ენაზეც გაშუქდება: „იმედი გვაქვს, ჩვენი აქტივობით გარკვეულ წვლილს შევიტანთ აფხაზური ენის დაცვისა და განვითარების საქმეში“.

საქართველოს მოსახლეობას აფხაზური ენის დღე ასევე მიულოცა პრემიერ-მინისტრმა გიორგი კვირიკაშვილმა.

„დღეს არის ძალიან მნიშვნელოვანი დღე - აფხაზური ენის დღე. აფხაზური ენა, ქართულთან ერთად, აფხაზეთის ტერიტორიაზე არის სახელმწიფო ენა. მინდა, მივულოცო ეს დღე არა მხოლოდ აფხაზური საზოგადოების წარმომადგენლებს, არამედ მთელ საქართველოს. ჩვენ ყველას გვჯერა, რომ მოვიშუშებთ იარებს და ყველანი ერთად ვიცხოვრებთ ერთიან, მშვიდობიან და ძლიერ ქვეყანაში“, - განაცხადა პრემიერმა.

[sknews.ge]