სახურავის საქმეზე მსჯავრდებულთან საპროცესო გაფორმდა

შპს „სამცხე XXI“-ს ხელმძღვანელმა გურამ ფარცახაშვილმა, რომელსაც გამოძიება 33 400 ლარის მითვისებას ედავებოდა და პატიმრობა 8 წლით ჰონდა მისჯილი, ბრალი აღიარა.

საპროცესო გარიგების მიხედვით, ფარცახაშვილს პატიმრობა 2 წლითა და ექვსი თვით, ასევე, პირობითი მსჯავრი 6 წლით მიესაჯა; გარდა ამისა მას ჯარიმა 5 000 ლარი დაეკისრა.

საპროცესო გარიგება ფარცახაშვილთან იმ ეტაპზე გაფრომდა, როცა საქმეს სააპელაციო სასამართლო იხილავდა. გარიგება ბრალდების მხარესა და მას შორის 20 მაისს გაფორმდა.

შეგახსენებთ, ფარცახაშვილის საქმე ახალციხეში, ასპინძის ქუჩა N28–ში მდებარე კორპუსის სახურავის შეკეთების სამუშაოებს ეხებოდა.

გურამ ფარცახაშვილი და ასევე, ახალციხის მუნიციპალიტეტის გამგეობის ინფრასტრუქტურის განვითარების სამსახურის ყოფილი სპეციალისტები რევაზ მერაბიშვილი და გიორგი ქასრაშვილი ფინანსთა სამინისტროს საგამოძიებო სამსახურის საგამოძიებო დეპარტამენტმა 2014 წლის 11 აპრილს დააკავა.

საქმის მასალების მიხედვით, 2013 წლის 17 ივლისს ახალციხის მუნიციპალიტეტის საკრებულოს მიერ გამოცხადებულ ელექტრონული ტენდერში ქ. ახალციხეში საცხოვრებელი კორპუსის სახურავების სარემონტო სამუშაოების შესრულებაზე, გამარჯვებულად გამოცხადდა შპს „სამცხე XXI.”. ტენდერის პირობების თანახმად, შესრულებულ სამუშაოებზე კონტროლი ევალებოდა ახალციხის მუნიციპალიტეტის გამგეობის ინფრასტრუქტურის განყოფილების სპეციალისტებს, რევაზ მერაბიშვილსა და გიორგი ქასრაშვილს, რომლებმაც შეადგინეს ყალბი მონაცემების ამსახველი სამუშაოების მიღება-ჩაბარებისა და შესრულებული სამუშაოების აქტები, სადაც არ იქნა ასახული შესრულებული სამუშაოს შესახებ რეალური მონაცემები, რომლის საფუძველზეც შესრულებულად ნაჩვენები იქნა 54 800 ლარის სამუშაოები, ხოლო ფაქტობრივად კი საწარმოს დირექტორის გიორგი ფარცახაშვილის მიერ მითვისებული იქნა 33 400 ლარი.

აღნიშნულ საქმეზე გამოძიება მიმდინარეობდა საქართველოს სისხლის სამართლის კოდექსის 333-ე, 341 და 182-ე მუხლებით, რაც სასჯელის სახით ითვალისწინებს თავისუფლების აღკვეთას 7 დან 11 წლამდე.

[თამუნა უჩიძე, ახალციხე]