ადიგენის საკრებულოს თავმჯდომარე სამსახურში დაბრუნდა, მანქანა საჯარიმოზე რჩება

ადიგენის საკრებულოს თავმჯდომარეს იმედა მღებრიშვილის ორკვირიანი საშვებულებო ვადა, დღეს 18 აპრილს ამოეწურა. მისი მოადგილის თამაზ ძაძამიას განცხადებით, მღებრიშვილი დილიდან სამსახურში გამოცხადდა.

„თავს კარგად გრძნობს, არაფერი ეტყობა. მანქანა კი, როგორც ვიცით, ჯერ ისევ საჯარიმოზეა“, – აცხადებს ძაძამია.

მღებრიშვილის სამსახურეობრივი „ჰიუნდაი სანტაფე“ მართლაც ჯერ ისევ საჯარიმო ავტოსადგომზე დგას. ჩაუტარდა თუ არა მანქანას ექსპერტიზა, აქ არ გვპასუხობენ: „არ გვაქვს უფლება რაიმე გითხრათ“.

პროკურატურაში კი აცხადებენ, რომ ექსპერტიზა დანიშნულია: „მიმდინარეობს გამოძიება“.

შეკთხვაზე, ვინ გადაიხდის დაზიანებული მანქანის შეკეთების ღირებულებას, ადიგენის მუნიციპალიტეტის საკრებულოს აპარატის უფროსი მიშა ბუცხრიკიძე გვპასუხობს, რომ არ იცის: „ბიუჯეტში ცვლილების შეტანის შესახებ ჯერ გამგეობიდან არანაირი დოკუმენტი არ შემოსულა“.

ადიგენის მუნიციპალიტეტის გამგებელი ზაქარია ენდელაძე ირწმუნება, რომ „მანქანის ხარჯს თვითმმართველობა ნამდვილად არ დაფარავს“.

ნახევრად შეკეთებული მანქანის ხარჯი იმ ხელოსანს, რომლის პროფილაქტიკაშიც სახლის უკან დამტვრეულ „ჰიუნდაი სანტაფეს“ მალავდნენ, უკვე გადაუხადეს: „არ ვიცი ვინ იყო, 300 ლარი იმან მომცა, ვინც მანქანა მომიყვანა. რუსულად ლაპარაკობდა“.

იმედა მღებრიშვილი „სამხრეთის კარიბჭეს“ სატელეფონო ზარებს არ პასუხობს.

შეგახსენებთ, რომ იგი მანქანის დამტვრევის ფაქტს კატეგორიულად უარყოფდა და ირწმუნებოდა, რომ სამსახურეობრივი მანქანით კახეთში იმყოფებოდა. „სამხრეთის კარიბჭე“ კი კონფიდენციალურ წყაროებზე დაყრდნობით წერდა, რომ იმედა მღებრიშვილი სამსახურეობრივი მანქანით ავარიაში მოყვა. რედაქციამ დამტვრეული შავი „ჰიუნდაი სანტაფე“ ახალციხის ერთ–ერთ „პროფილაქტიკაში“ გადაიღო. "სამხრეთის კარიბჭემ" საკრებულოს თავმჯდომარის ავარიის შესახებ სტატია 7 აპრილს გამოქვეყნა, 8 აპრილს მომხდარით სამცხე–ჯავახეთის საოლქო პროკურატურის საგამოძიებო ნაწილი დაინტერესდა. ძიება სისხლის სამართლის კოდექსის ორი მუხლით დაიწყო; ამასობაში, დამტვრეული 'ჰიუნდაი სანტაფე' სახელოსნოდან საჯარიმო ავტოსადგომზე გადაიყვანეს.


საჯარიმოზე მდგომი ავტომანქანა

[თამუნა უჩიძე,ადიგენი]