საჯარო რეესტრის სერვისებით სარგებლობა PayBox-ის აპარატებითაც გახდა შესაძლებელი

რეესტრის ინფორმაციით, PayBox-ის აპარატებით მოქალაქეებს უძრავი ქონების რეესტრიდან ამონაწერის ან საკადასტრო გეგმის მიღების და ტექნიკური ხარვეზის შესწორების საშუალება აქვთ.

სერვისის მისაღებად მოქალაქემ PayBox-ის აპარატში მომსახურების სასურველი ტიპი უნდა შეარჩიოს, შესაბამისი ფორმა შეავსოს, მომსახურების ვადა, საფასური და დაინტერესებული პირის რეკვიზიტები მიუთითოს, უძრავი ქონების იდენტიფიკაციის შემდეგ კი ტელეფონის ნომრის ველი შეავსოს. დაინტერესებული პირი სარეგისტრაციო წარმოების მიმდინარეობის შესახებ ინფორმაციას მოკლე ტექსტური შეტყობინებით სწორედ ამ ნომერზე მიიღებს. იმ შემთხვევაში კი, თუ მოქალაქე სერვისის საფასურს ზედმეტად გადაიხდის, ხურდის სახით თანხა მას ამავე ნომერზე დაერიცხება.

საჯარო რეესტრის ეროვნული სააგენტოს ინფორმაციით, PayBox-ის აპარატებით ამონაწერის განახლებას მოქალაქე ნაკლებ საფასურად შეძლებს: ამონაწერის 1 დღის ვადაში განახლება 15 ლარის ნაცვლად 10 ლარი ღირს, იმავე დღეს მომზადება კი - 50-ის ნაცვლად 40 ლარი. საკადასტრო გეგმის 1 დღის ვადაში განახლება კვლავაც 5 ლარია, იმავე დღეს - 20 ლარი. ტექნიკური ხარვეზის შესწორების სერვისით სარგებლობა კი უფასოა.

„ჩვენთვის, როგორც მოქალაქეზე ორიენტირებული უწყებისთვის, განსაკუთრებით მნიშვნელოვანია დისტანციური არხების გაფართოება და მომხმარებლებისთვის კიდევ უფრო მეტი კომფორტული მომსახურების შეთავაზება. ეს დისტანციური არხები მოქალაქეებს საშუალებას აძლევს ჩვენი სერვისები საჯარო რეესტრის ეროვნულ სააგენტოში მოსვლის გარეშე მიიღონ და დრო დაზოგონ. ვფიქრობთ, PayBox-ის აპარატებით მომხმარებლები აქტიურად ისარგებლებენ“,-აცხადებს საჯარო რეესტრის ეროვნული სააგენტოს თავმჯდომარე პაპუნა უგრეხელიძე.
სააგენტო სამომავლოდ PayBox-ის აპარატებით შეთავაზებული სერვისების გაფართოებას გეგმავს. მომდევნო ეტაპზე მოქალაქეებს სამეწარმეო რეესტრის მომსახურებებით სარგებლობა, განცხადებების ძებნა და ამობეჭდვაც შეეძლებათ.

PayBox-ის აპარატების გარდა, საჯარო რეესტრის მომსახურებების მიღება დისტანციურად ონლაინ, სააგენტოს ვებ-გვერდიდან http://napr.gov.ge/, იუსტიციის სახლის ვებ-გვერდიდან http://psh.gov.ge/ და ასევე მოქალაქის პორტალიდანააhttp://my.gov.ge შესაძლებელი.

[sknews.ge]