ახალციხეში ‘სათნოების სახლის’ რეაბილიტაცია დაიწყო

„სათნოების სახლის“ სარეაბილიტაციო სამუშაოებს ტენდერში გამარჯვებული კომპანია შპს „ნიუ პროჯექტი“ ასრულებს. რეაბილიტაციისთვის ადგილობრივი ბიუჯეტიდან 21.811 ლარი დაიხარჯება.

სამუშაოები ერთი თვის განმავლობაში გაგრძელდება. მოწესრიგდება საკანალიზაციო სისტემა და სველი წერტილები. სარემონტო სამუშაოები ჩაუტარდება სამზარეულოს, სასადილოს და დამხმარე ოთახს. დაგეგმილია შენობა–ნაგებობის სახურავის რეაბილიტაცია - გადახურვა.

შენობის სარეაბილიტაციო სამუშაოების დასრულებამდე „სათნოების სახლი“ ილია მართლის N 22-ში იფუნქციონირებს.

„ბენეფიციარებს ერთი დღეც რომ არ შეწყვეტოდათ კვება, ავეჯი და ინვენტარი ღამის საათებში გადავიტანეთ“,- აცხადებს სათნოების სახლის დირექტორი ვერა ბარძიმაძე.

შეგახსენებთ, რომ სურსათის ეროვნული სააგენტო ახალციხის „სათნოების სახლში“ 2015 წლის 30 ივლისს შევიდა. სააგენტოს წარმომადგენლებმა „სათნოების სახლში“ არა ერთი დარღვევა დააფიქსირეს.

დოკუმენტური შემოწმების შემდეგ დაწესებულებას საკანალიზაციო ქსელის მოწესრიგებისთვის ვადა 15 სექტემბრამდე მიეცა. მოგვიანებით, კი ეს ვადა 25 დეკემბერამდე გადაიწია.

მაშინ მერიაში განმარტავდნენ, რომ ბევრი საქმის გამო, პროექტის შესადგენად დრო ვერ გამონახეს.

[თინათინ ზაზაძე, ახალციხე]