შსს-მ დამალის მცხოვრები დააკავა

"2012 წლის 28 ნოემბერს შსს ასპინძის რაიონული სამმართველოს თანამშრომლებმა ჩატარებული ოპერატიულ-სამძებრო ღონისძიებების შედეგად დააკავეს ასპინძის რაიონის სოფელ დამალაში მცხოვრები სომხეთის მოქალაქე, 1959 წელს დაბადებული ვრეჟ მ. ჩხრეკისას მისი საცხოვრებელი სახლის სხვენიდან ამოიღეს: კალაშნიკოვის სისტემის ავტომატური ცეცხლსასროლი იარაღი, 3 ცალი მჭიდი, 175 ცალი 5,45 მმ-იანი და 47 ცალი 7,62 მმ-იანი ავტომატური ცეცხლსასროლი იარაღის ვაზნა, 2 ხელყუმბარა; ავტომატისათვის განკუთვნილი ხიშტ-დანა ქარქაშით, გლუვლულიანი 16 კალიბრიანი ერთლულიანი სანადირო თოფი. აღნიშნულ საბრძოლო მასალას ვრეჟ მ. უკანონოდ ინახავდა", - ნათქვამია განცხადებაში, რომელიც საქართველოს შინაგან საქმეთა სამინისტრომ გაავრცელა.

შსს-ს ინფორმაციით, დაკავებულმა ჩადენილი დანაშაული აღიარა. გამოძიება მიმდინარეობს სისხლის სსკ-ის 236-ე მუხლის პირველი ნაწილით. გამოძიებას შსს ასპინძის რაიონული სამმართველო აწარმოებს.

[ნინო ნარიმანიშვილი, ახალციხე]