სამცხე–ჯავახეთში დაკავებული შვიდი პირიდან ორი ცოლ–ქმარია

საქმის მასალების მიხედვით ხე–ტყის უკანონო ტრანსპორტირებისთივს ცოლ–ქმარი ყალბ დოკუმენტებს ამზადებდა, დანარჩენი დაკავებულები კი მძღოლები არიან და მათ ამ დოკუმენტების გამოყენებაში ედავებიან.

შვიდივე მათგანი ადიგენის მუნიციპალიტეტის მკვიდრია. მათ შორის ერთ–ერთი, ქალბატონი უკვე სახლშია. იგი პროკურორის დადგენილებით, რადგან ბრალს აღიარებდა, საზოგადოებისთივს საშიშ პიროვნებას არ წარმოადგენდა და ჰყავდა შვილები, გადაწყდა, რომ პატიმრობაში აღარ დაეტოვებინათ. ორი შვილის დედა მეუღლესთან ერთად გუშინ, 11 იანვარს დააკავეს და შინ გუშინვე გაუშვეს.

„ცოლიცა და ქმარიც ჩადენილ დანაშაულს აღიარებს“, – ამბობს ადვოკატი ირაკლი ბარძიმაძე.

არცერთ მათგანს ჯერ ბრალი არ წარგენია, სავარაუდოდ, მათ ბრალს დღის ბოლომდე წაუყენებენ ხვალ კი აღკვეთის ღონისძიება შეეფარდებათ.

შეგახსენებთ, რომ საქართველოს ფინანსთა სამინისტროს საგამოძიებო სამსახურმა, სამცხე-ჯავახეთში შვიდი მოქალაქე დააკავა. საქმეზე ჩატარებული გამოძიებით დადგინდა, რომ ბრალდებულებს ხე-ტყის ტრანსპორტირებისათვის საჭირო სასაქონლო ზედნადებში, სისტემატურად შეჰქონდათ ყალბი მონაცემები მასალის წარმოშობის დამადასტურებელი დოკუმენტაციის შესახებ, რის შემდეგაც, აღნიშნული ყალბი ოფიციალური დოკუმენტებით ახორციელებდნენ უკანონოდ მოპოვებული ხე - ტყის მასალის ტრანსპორტირებას და რეალიზაციას საქართველოს მასშტაბით.

[თამუნა უჩიძე, ახალციხე]