სახალხო დამცველი სომეხთა სამოციქულო ეკლესიას შობას ულოცავს

„სომეხთა და ქართველთა შორის საუკუნეების მანძილზე არსებული კეთილმეზობლური დამოკიდებულება სამაგალითოა და ამ ძვირფას მონაპოვარს მომავალი თაობებიც უნდა უფრთხილდებოდნენ. ისტორიული განვითარების გზაზე ჩვენი ერები და ეკლესიები ხშირად მდგარან ერთნაირი გამოწვევების წინაშე, თუმცა მაინც მოახერხეს დამოუკიდებლობისა და თვითმყოფადობის შენარჩუნება. დღეს ჩვენი მთავარი გამოწვევა თანასწორი უფლებების სრული რეალიზებაა.

ვუსურვებ საქართველოს მოქალაქე ეთნიკურ სომხებს სამართლიან, ტოლერანტულ, თანასწორუფლებიან გარემოში ცხოვრებასა და განვითარებას“, – ნათქვამია საქართველოს სახალხო დამცველის განცხადებაში.

შეგახსენებთ, დღეს, 6 იანვარს სომეხთა სამოციქულო ეკლესია იესო ქრისტეს შობისა და ნათლისღების დღესასწაულებს ზეიმობს. დღესასწაულს სომხეთის სამოციქულო ეკლესიის საქართველოს ეპარქიის ყველა მოქმედ ტაძარში აღნიშნავენ. დილით ტაძრებში წირვა აღევლინება, რის შემდეგაც სრულდება წყალკურთხევა - იესოს ნათლისღება.

[ნინო ნარიმანიშვილი, ახალციხე]