ახალქალაქში მოკლული კრიმინალური ავტორიტეტის ახლობლების აქციამ სამხარეო სამმართველოსთან გადაინაცვლა

გარდაცვლილის ახლობლების მოთხოვნა იგივეა, ნინოწმინდაში დაკავებული სამი ახალგაზრდა, გასამართლდეს არა დანაშაულის შეუტყობინებლობისთვის, არამედ, დანაშაულში მონაწილეობისთვის.

„სამართლიანად ჩატარდეს ყველაფერი, წინააღმდეგ შემთხვევაში იარაღს ჩვენც ავიღებთ ხელში“, – აცხადებენ აქციის მონაწილეები.

გარდაცვლილის და მანია აკობიანი და მისი შვილი, ამ დროისთვის სამხარეო სამმართველოს შენობაში შეიყვანეს. სავარაუდოდ, ისინი სამხარეო სამმართველოს უფროსს შეხვდებიან.

შეგახსენებთ, დღეს, 21 ოქტომბერს, ახალქალაქში მოკლული კრიმინალური ავტორიტეტის საქმეზე დაკავებულების პროცესი უნდა გამართულიყო, თუმცა, პროკურორის გამოუცხადებლობის გამო გადაიდო. პროცესის გადადებას გარდაცვლილის ახლობლების პროტესტი მოჰყვა.

ტრანსფარანტებით: „ჩვენ აღარ გავჩუმდებით“, სამცხე–ჯავახეთში მოვითხოვთ სამართლიანობას','სამცხე–ჯავახეთის სამართალდამცავი ორგანოები, რეგიონული პოლიცია და პროკურატურა მოქრთამულია“, – გარდაცვლილის ახლობლებმა აქციები ჯერ ახალციხის რაიონულ სასამართლოსთან გამართეს. ისინი პროკურორის მამუკა ქომოშვილის გამოუცხადებლობას აპროტესტებენ.

შეგახსენებთ, რომ კრიმინალური ავტორიტეტი სარქის აკოფიანი, ახალქალაქის მუნიციპალიტეტის სოფელ ორჯასთან, დღისით ჩაცხრილეს. რამდენიმე დღის შემდეგ, სამართალდამცველებმა სოფელ განძაში, კარაპეტიანი, იგიტიანი და ნალბანდიანის დააკავეს. სამივე მათგანს სსკ–ის 376–ე მუხლით ედება ბრალი, რაც დანაშაულის შეუტყობინებლობას გულისხმობს. ნალბანდიანს კი გარდა 376–ე მუხლისა, ბრალს 353–ე მუხლით, პოლიციის თანამშრომელზე თავდასხმისთვისაც სდებენ.

[ვარლამ წილკაური, თინათინ ზაზაძე, ახალციხე]