ახალქალაქის საცურაო კომპლექსი: პრეისტორია და პრობლემები

ახალქალაქის საცურაო კომპლექსი ზედმეტი ხმაურის გარეშე გაიხსნა და იქ საცურაოდ ბავშვებიც და უფროსებიც უკვე დადიან. თანამშრომელთა შტატი დაკომლექტებულია. კომპლექსს ყავს ბუღალტერი, მედდა და მწვრთნელი მამაკაცებისთვის, ჯერჯერობით არ არის მხოლოდ ქალბატონების მწვრთნელი.

საცურაო კომლექსი ორი აუზისგან შედგება. ერთი აუზი უფროსებისთვისაა განკუთვნილი, მცირე აუზი კი პატარებისთვის. არის გასახდელები და შხაპის კაბინები.

აუზში საცურაოდ შესასვლელად საჭიროა დაბადების მოწმობა, ფოტოსურათი და ცნობა საავადმყოფოდან ჯანმრთელობის მდგომარეობის შესახებ.

”იქნება ქალების და მამაკაცების დღეები, თუმცა, ჯერჯერობით კონკრეტული არაფერია გადაწყვეტილი. ბავშვებს ცნობის გარეშე არ ვიღებთ, ამის შესახებ საავადმყოფოს მთავარი ექიმი გაფრთხილებულია. ცნობა უნდა მოწმობდეს, რომ ბავშვი ჯანმრთელია. ცნობის მოტანის შემდეგ ბავშვებს მეც ვსინჯავ, რათა დავრწმუნდე, რომ ცნობის მონაცემები სინამდვილეს შეეფერება. მოცურავეებზე პასუხს არ ვაგებ, ეს პასუხისმგებლობა საავადმყოფოს ეკისრება”, - ამბობს კომპლექსის მედდა სვეტლანა კეიანი.

საცურაო აუზში უკვე ჩაწერილია 14 წლამდე ასაკის 29 ბავშვი სამ ჯგუფში. მედდა სვეტლანა კეიანის თქმით, ცურვაზე სიარულის მსურველები ბევრნი არიან.

საცურაო კომპლექსის დირექტორი აშოტ ხანოიანი ამბობს, რომ აუზების შესანახად სახელმწიფომ წელიწადში 120 ათასი ლარი გამოყო. ყველაფერი კარგად იქნებოდა, მშენებლებს სავენტილაციო სისტემის გაყვანისას შეცდომა რომ არ დაეშვათ. ამიტომ საცურაო კომპლექსის გასანიავებლად იძულებულნი არიან, ფანჯრები გააღონ. ცუდი ვენტილაციის გამო ახალი შენობის კედლებზე ნესტის ნიშნები უკვე შეიმჩნევა.

”აუზი უკვე ერთი თვეა მუშაობს. მისი ექსპლუატაციის ხარჯის ანაზღაურება სახელმწიფომ იკისრა. მაგრამ გასაკეთებელი ბევრია, სადღაც რაღაც დაზიანდა, საჭიროა რემონტი. ვენტილაცია ცუდად მუშაობს. თუმცა ყველაფერი ნელნელა ნორმაში დგება. ჯერჯერობით სააბონენტო გადასახდელი დაწესებული არ არის, ყველას შეუძლია და დადიან კიდეც საცურაოდ. საკრებულოს სხდომა ჯერ არ ჩატარებულა, რომ სააბონენტო გადასახდელი დაწესდეს. სავარაუდოდ ეს იქნება 50 ლარი თვეში უფროსებისთვის და 25 ლარი ბავშვებისთვის”, - ამბობს ახალქალაქის მუნიციპალიტეტის გამგეობის ეკონომიკის სამსახურის ხელმძღვანელი ვაან ბატოიანი.

მეორე პრობლემა მკაცრი ახალქალაქური ზამთარია. როგორ იმუშავებს საცურაო აუზი ზამთრის ყინვებში, უცნობია. დირექტორი აშოტ ხანოიანი გვარწმუნებს, რომ საცურაო კომპლექსი ზამთარშიც იფუნქციონირებს და ვენტილაციის პრობლემასაც მალე მოაგვარებენ.



საცურაო აუზის გახსნას ახალქალაქელები თითქმის ორი წელი ელოდნენ. თავდაპირველად, მოგებული ტენდერის პირობების თანახმად, კომპლექსი ჯერ კიდევ 2010 წლის ნოემბრის ბოლოს უნდა გახსნილიყო. თუმცა საცურაო კომპლექსის მშენებლობა თითქმის ორი წელი გაჭიანურდა.

მშენებლობის გაჭიანურების მიზეზის, შესრულებული სამუშაოსა და დახარჯული თანხების შესახებ ინფორმაციის მისაღებად ახალქალაქის მუნიციპალიტეტის გამგეობას მივმართეთ და საცურაო კომპლექსის მშენებლობის ხელშეკრულებასთან დაკავშირებული ყველა დოკუმენტის ქსეროასლი მოვითხოვეთ.

2012 წლის 17 ივლისს გაკეთებული #15 მოთხოვნის საპასუხოდ 2012 წლის 17 ოქტომბერს მივიღეთ #785 პასუხი: `გაცნობებთ, რომ ტენდერის ჩატარების შეკვეთასთან და ქალაქ ახალქალაქის მალხასიანის ქ. #2 მისამართზე ასაშენებელი დახურული საცურაო კომპლექსის მშენებლობასთან დაკავშირებული მთელი დოკუმენტაცია, ახალქალაქის რაიონული სასამართლოს #11/ა-106-12 განჩინებით, 2012 წლის 19 ივნისს ამოღებულ იქნა საქართველოს ფინანსთა სამინისტროს საგამოძიებო დეპარტამენტის სამცხე-ჯავახეთის მხარის საგამოძიებო სამსახურის მიერ (ამოღების ოქმი თარიღდება 2012 წლის 21 ივნისით)~, - ვკითხულობთ ჩვენს მოთხოვნაზე მიღებულ პასუხში.

ახალქალქის გამგეობის მიერ მოწოდებული ინფორმაციის თანახმად, ცნობილი გახდა, რომ პროექტის ხარჯთაღრიცხვის ღირებულება შეთავაზებული იყო 928 ათასი ლარის ოდენობით. 2010 წლის 14 ივლისს ტენდერში გაიმარჯვა ფირმამ შპს `გ ლ კონსტრაქშენი~ თანხით 838 ათასი ლარი. საცურაო კომპლექსის მშენებლობის დასრულების ვადა 2010 წლის ნოემბრის ბოლო უნდა ყოფილიყო. დაფინანსება შერეული იყო: 500 ათასი სახელმწიფო ბიუჯეტიდან, დანარჩენი 338 ათასი კი ადგილობრივი ბიუჯეტიდან.

თუმცა კომპანიამ მითითებულ ვადაში მშენებლობა ვერ დაასრულა და 2010 წლის დეკემბერში თვეში 16,750 ლარით დაჯარიმდა. იმავდროულად ზამთრის პერიოდში სამშენებლო სამუშაოები შეჩერდა და 2011 წლის მაისისთვის იქნა გადატანილი სამუშაოების ბოლომდე დასრულების ვადამდე ყოველთვიური ჯარიმის გადახდის პირობით, რაზეც კომპანიის დირექციამ თანხმობა განაცხადა.

სამშენებლო სამუშაოები მხოლოდ 2011 წლის სექტემბრის დასაწყისში დასრულდა, რაც ნიშნავდა, რომ ჯარიმის გადახდის დაწყებისთვის დადგენილი ვადიდან 4 თვე გავიდა.

`თუმცა 4 თვის განმავლობაში დარიცხული ჯარიმა 67 ათასი ლარის ოდენობით კომპანიამ არ გადაიხადა, რის გამოც საქმე სასამართლოს გადავეცით. ამჟამად დახურული საცურაო კომპლექსი ფუნქციონირებს. ცურვის მსურველები მიღებულნი არიან (200-მდე ბავშვი), ცურვაში რეგულარული მეცადინეობები დაწყებულია~, - ვკითხულობთ ახალქალაქის მუნიციპალიტეტის გამგეობის პასუხში.


[ქრისტინა მარაბიანი, ახალქალაქი]