გაზაფხულის თოვლი სამცხე-ჯავახეთში

ახალციხეში თოვა გამთენიისა დაიწყო. დილით ადგილობრივებს ქალაქი გადათეთრებული დახვდათ.
დღეს დილიდან თოვლიანი ახალციხის ფოტოების სიჭარბეა სოციალურ ქსელებშიც.

„თვალებს არ ვუჯერებ“, „ათოვს აყვავებულ ტყემლებს“, „შარშანაც ამ დროს თოვდა“, „გავიღვიძე, ფარდა გადავწიე და...“ , - წერენ ადგილობრივები.

„ასეთი თოვლი ბორჯომში ზამთარშიც არ ყოფილა“, - დათოვლილი ბორჯომის ფოტოებს ავრცელებენ ბორჯომის მცხოვრებლებიც. ბორჯომსა და ბაკურიანში თოვდა გუშინაც.

მოსახლეობა ფიქრობს, რომ თოვლი გაზაფხულში უნალექო ზამთრის გამოძახილია.

სოფლის მეურნეობის სპეციალისტები ამბობენ, რომ მიუხედავად თოვლისა, თბილა და ამიტომ დღის განმავლობაში უკვე დაკვირტულ ხეხილს საფრთხე არ ემუქრება. თუმცა, საფრთხე არსებობს ღამით, თუ ტემპერატურა დაიკლებს.

„ტემპერატურა მინუსებში არ გადასულა, თოვლი ხეებიდან მალე ჩამოდნა, ამიტომ აყვავებულ ხეებს ჯერჯერობით საფრთხე არ ემუქრება. თუმცა, როგორც ვიცი, დღეს ღამე დაბალი ტემპერატურაა მოსალოდნელი, ამან კი შეიძლება სერიოზული პრობლემა შეუქმნას ყვავილს“, – ამბობს სასოფლო – საკონსულტაციო სამსახურის დირექტორი გურამ ჯინჭველაძე.

მისივე თქმით, ყინვა აპრილის ბოლოს უფრო სახიფათოა, რადგან ამ პერიოდში ყვავილი თითქმის ყველა ხეს აქვს.







სტატიაში გამოყენებულია სოციალურ ქსელში გავრცელებული ფოტოები
[მანანა სარაშვილი, ახალციხე]
[hide][/hide]