ნოდარ ხადურის თავმჯდომარეობით ახალციხეში საგადასახადო დავები განიხილეს

ფინანსთა სამინისტროს დავების განხილვის საბჭოს წევრებმა სამცხე – ჯავახეთში მცხოვრები 10 – მდე მეწარმის საგადასახადო დავა განიხილეს. საბჭო ბიზნესმენებს შედეგებს ხუთი დღის ვადაში აცნობებს.

„კომისიის წევრებს ჩემი პრობლემა მოვახსენე, დეტალურად განვიხილეთ ყველაფერი. როგორც მითხრეს, პასუხს რამდენიმე დღეში მაცნობებენ. ზოგადად ეს ინიციატივა ძალიან კარგია, რადგან აღარ მოგვიწევს თბილიში წასვლა, ლოდინი. აქ ადგილზვე განიხილავენ ჩვენს საქმეს“, – ამბობს მეწარმე ნერსეს გონციანი.

საქართველოს ფინანსთა სამინისტროში ამბობენ, რომ საგადასახადო დავების განხილვა რეგიონებში ფინანსთა სამინისტროს ინიციატივაა. მიზანი საბჭოს მუშაობის გამჭვირვალობა და გადასახადის გადამხდელთა ინტერესების დაცვის უზრუნველყოფაა.

ნოდარ ხადური ამბობს, რომ აღნიშნული ინიციატივის განხორციელების შედეგად, რეგიონებში მცხოვრებლებს ფინანსთა სამინისტროს დავების განხილვის საბჭოში შეტანილი საჩივრების განსახილველად დედაქალაქში ჩასვლა აღარ სჭირდებათ. ეს კი მათ დანახარჯების შემცირებისა და დროის დაზოგვის შესაძლებლობას აძლევს.

„ბიზნესმა უნდა იგრძნოს, რომ სახელმწიფო, შემოსავლების სამსახური და ფინანსთა სამინისტრო არის მისი მეგობარი და თანამოაზრე. იმისთვის, რომ ბიზნესი არ მოცდეს, ჩვენ გადავწყვიტეთ რეგიონებში ჩავიდეთ და ადგილზე მოვისმინით მცირე და საშუალო ბიზნესმენების პრობლემები და მოსაზრებები. მოგეხსენებათ, რომ მათ არ აქვთ იმის საშუალება, დაიქირავონ კარგი იურისტები და ბუღალტრები“, – განაცხადა ფინანსთა მინისტრმა.



[მანანა სარაშვილი, ახალციხე]