საქართველოში კორონავირუსით 26-ე პაციენტი გარდაიცვალა

დაავადებათა კონტროლის ეროვნული ცენტრის ხელმძღვანელის, ამირან გამყრელიძის თქმით, გარდაცვლილი 70 წლის იყო, შემთხვევა აჭარაში დაფიქსირდა.

„გარდაცვლილი არის 70 წლის, იგი კლინიკაში 17 სექტემბერს შემოიყვანეს. ჰქონდა მძიმე თანმდევი დაავადებები, გულის იშემიური დაავადება, ფილტვის ქრონიკული ობსტრუქციული დაავადება და შევიდა უკვე კრიტიკულ სიტუაციაში“, - ამბობს გამყრელიძე.

ბოლო 24 საათში საქართველოში კორონავირუსის რეკორდული მაჩვენებელი, 259 ახალი შემთხვევა გამოვლინდა, სულ ქვეყანაში კორონავირუსის 4399 შემთხვევაა დაფიქსირებული, გამოჯანმრთელებული პაციენტების რაოდენობა 1 705–მდე გაიზარდა.

კორონავირუსის პირველი შემთხვევა 26 თებერვალს დაფიქსირდა.

[მარიამ ბარძიმაძე]