ნუცუბიძეზე მომხდარ მკვლელობაში ბრალდებული ახალციხელი ბიზნესმენის შვილია

მკვლელობა დღეს, რვა მარტს მოხდა. შსს–ს ინფორმაციით, 1975 წელს დაბადებული ვ.შ, თბილისში პაბლო პიკასოს ქუჩაზე მცხოვრები, ახალციხელი ბიზნესმენის სახლში მივიდა და ოჯახის ერთ–ერთ წევრს, ს.თ–ს ცივი იარაღის გამოყენებით ჭრილობები მიაყენა. რის შემდეგაც, ს.თ–მ კუთვნილი ცეცხლსასროლი იარაღის მრავალჯერადი გასროლით მას სასიკვდილო ჭრილობა მიაყენა, პირი ადგილზე გარდაიცვალა.

ბიზნესმენის შვილი ამჟამად სამედიცინო დაწესებულებაშია, მას მრავლობითი ჭრილობები აქვს მიყენებული გულ–მკერდის, თავისა და ხელების არეში. ექიმების განმარტებით, მის სიცოცხლეს საფრთხე არ ემუქრება.

შინაგან საქმეთა სამინისტროს ცნობით, პოლიციელებმა განზრახ მკვლელობისა და ცეცხლსასროლი იარაღის უკანონო ტარების ბრალდებით, 1990 წელს დაბადებული – ს.თ. დააკავეს. დანაშაული 7-დან 15 წლამდე ვადით თავისუფლების აღკვეთას ითვალისწინებს.

ვრცელდება ინფორმაცია, რომ გარდაცვლილი ვ.შ.–ს დედა ბიზნესმენის სახლში მუშაობდა.

მეზობლების თქმით, შემთხვევის დროს, ახალციხელი ბიზნესმენი და მისი მეუღლე სავარაუდოდ ახალციხეში იმყოფებოდნენ.

[sknews.ge]