შსს-მ ფილმში 'და ჩვენ ვიცეკვეთ' პორნოგრაფია ვერ აღმოაჩინა

შსს-ს ფილმის შინაარსის შესწავლის მოთხოვნით რუსეთის საგარეო საქმეთა სამინისტროს მიერ შექმნილი გორჩაკოვის ფონდის დაარსებული პრიმაკოვის ფონდის ხელმძღვანელმა დიმიტრი ლორთქიფანიძემ მიმართა.

„მიმდინარე წლის რვა ნოემბერს, მოქალაქე დიმიტრი ლორთქიფანიძის მიერ სამინისტროში შემოტანილ იქნა განცხადება თანდართული მასალებით, რომლის თანახმად, აღნიშნული პირი მოითხოვდა ფილმის შინაარსის შესწავლამდე, მისი ჩვენების შეზღუდვას. შინაგან საქმეთა სამინისტროს დანაშაულის ნიშნების არარსებობის გამო, განცხადებაზე გამოძიება არ დაუწყია“,- ნათქვამია შსს-ს მიერ მოწოდებულ ინფორმაციაში.

ლორთქიფანიძე ამბობდა, რომ ფილმი „პორნოგრაფიული კონტენტს“ შეიცავს, რაც საქართველოს სისხლის სამართლის კოდექსის 255-ე მუხლის 1-ლი ნაწილის თანახმად არის „ასეთი ფილმის კინოგაქირავებაში ჩაშვების გამომრიცხავი გარემოება“.

„და ჩვენ ვიცეკვეთ” ფილმის ჩვენება თბილისსა და ბათუმში აქციების ფონზე მიმდინარეობდა.

შინაგან საქმეთა სამინისტრომ ფილმის ჩვენებისას საპროტესტო აქციების დროს მომხდარ ინციდენტებთან დაკავშირებით ოთხ ფაქტზე დაიწყო გამოძიება. დააკავა 27 პირი, დაშავდა ორი მოქალაქე და ამდენივე პოლიციელი.

ქართულ–შვედური წარმოების ქვიარ თემატიკაზე შექმნილი ფილმის „და ჩვენ ვიცეკვეთ“ ერთ–ერთი მთავარი გმირი ახალციხელი მსახიობი და რეჟისორი კახა გოგიძეა. მან თბილისში კინოთეატრებთან გამართულ აქციებს, რუსეთის მიერ დაგეგმილი უწოდა.

[sknews.ge]