UNFPA: სამცხე-ჯავახეთში მომავალი შვილის სქესის შერჩევა საზიანო პრაქტიკად არ მიაჩნიათ

კვლევა საქართველოს ოთხ რეგიონში – სამცხე-ჯავახეთში, ქვემო ქართლში, კახეთსა და სამეგრელო-ზემო სვანეთში ჩატარდა.

კვლევის ზოგადი შედეგების მიხედვით, ვაჟისადმი უპირატესობის მინიჭების პრაქტიკა კვლავ არსებობს საქართველოში. ამ ნიშნით სქესის შერჩევა კი, წინა წლებში უფრო ფართოდ იყო გავრცელებული.

კვლევაში ნათქვამია, რომ ოთხივე რეგიონში სქესის შერჩევის შესახებ ინფორმირებულობის დონე მაღალია, მის მიმართ დამოკიდებულება კი, რეგიონების მიხედვით, განსხვავებულია.

„ქვემო ქართლსა და სამცხე-ჯავახეთში რესპონდენტები გენდერული ნიშნით სქესის შერჩევას საზიანო პრაქტიკად არ აღიქვამენ და ხაზს უსვამენ გვარის გაგრძელებისათვის ვაჟის გაჩენის მნიშვნელობას. მათგან განსხვავებით, კახეთსა და სამეგრელო-ზემო სვანეთში გამოვლინდა უარყოფითი დამოკიდებულება გენდერული ნიშნით სქესის შერჩევის პრაქტიკის მიმართ“, - ნათქვამია კვლევაში.

კვლევის რეკომენდაციების ნაწილში აღნიშნულია, რომ ვაჟისადმი უპირატესობის მინიჭების არსებული პრაქტიკის აღმოსაფხვრელად, ძირითადი მიმართულება უნდა ეფუძნებოდეს სიღარიბის შემცირებას, გენდერული თანასწორობის ხელშეწყობას და ქალების გაძლიერებას: „სამცხე-ჯავახეთსა და ქვემო ქართლში ჩატარებულმა ფოკუს ჯგუფებმა აჩვენა სახელმწიფო სოციალური პროგრამების შესახებ ცნობიერების დაბალი დონე, რაც მიუთითებს ეთნიკურ უმცირესობებში ინფორმაციის გავრცელების ბარიერების არსებობაზე“.

გაერო–ს მოსახლეობის ფონდის საქართველოს ოფისში განმარტავენ, რომ ვაჟებისადმი უპირატესობის მინიჭების კლების ტენდენცია 2005 წლიდან შეინიშნება.

„საქართველოში 90-იანი წლების დასაწყისიდან დაირღვა დაბადებისას სქესთაშორისი ბალანსი – გაცილებით უფრო მეტი ვაჟი იბადებოდა, ვიდრე ბუნებრივად უნდა დაბადებულიყო და, შესაბამისად – ნაკლები გოგონა, რაც გარკვეულწილად იწვევს მოსახლეობის დემოგრაფიულ-სტრუქტურულ ცვლილებებს. ამ კვლევის მიზანი იყო, გამოერკვია, რამ გამოიწვია, რა არის ის შესაძლო ფაქტორები, რაც გავლენას ახდენს დადებით ტენდენციაზე საქართველოში, ვინაიდან საქართველოს მაგალითი იყოს სანიმუშო იმ ქვეყნებისათვის, სადაც ეს პრაქტიკა გავრცელებულია და ეს ფენომენი არსებობს“, - აცხადებს გაეროს მოსახლეობის ფონდის ოფისის ხელმძღვანელი ლელა ბაქრაძე.



[თაკო ფექირიშვილი, ახალციხე]