ახალციხელი მოკრივე ლონდონში სარეიტინგო ბრძოლას გამართავს

მოკრივეების სარეიტინგო ბრძოლა 28 სექტემბერს, ქალაქ ლონდონში გაიმართება. მასში მონაწილეობას, ევროპის ქვეყნებიდან, პროფესიონალი მოკრივეები მიიღებენ.

ახალციხელი ხვიჩა გიგოლაშვილი მაღალი საფეხურისთვის იბრძოლებს: „სარეიტინგო ბრძოლა მნიშვნელოვანია, რადგან, გამარჯვების შემთხვევაში, მაღალ საფეხურზე ადიხარ და შემდეგ შეგიძლია ტიტულისთვის ბრძოლა“, - ამბობს 24 წლის მოკრივე.

გიგოლაშვილი, უკვე წლებია, ახალციხეში ვარჯიშობს. ბოლო წარმატებული ბრძოლა მას აპრილში, საფრანგეთში ჰქონდა, საიდანაც თასით დაბრუნდა. ასევე მონაწილეობდა ინგლისში გამართულ შეჯიბრშიც: „ლონდონის ბრძოლა იყო, რომელსაც იქაური ცნობილი ადამიანები ესწრებოდნენ და მე დავამარცხე ადგილობრივი პოპულარული, გამოცდილი მოკრივე პოლ რობერტსი. პარიზში კი დიდ არენაზე ვიბრძოლე, სადაც 5 000 ადამიანი ესწრებოდა და დავამარცხე ადგილობრივი ლაჰუსეინ ლავადი“, - ამბობს ხვიჩა გიგოლაშვილი.

[თაკო ფეიქრიშვილი, ახალციხე]