სამაგისტრო გამოცდის შედეგები ცნობილია

სამაგისტრო გამოცდის შედეგები დღეს, 16 აგვისტოს გამოქვეყნდა. შეფასებისა და გამოცდების ეროვნული ცენტრის ინფორმაციით, შედეგების გასაჩივრება, მსურველებს 19 აგვისტოს 10:00 საათიდან 23 აგვისტოს 18:00 საათამდე, მხოლოდ ელექტრონულად, ვებ-გვერდებზე: online.naec.ge და www.naec.ge შეეძლებათ.

სააპელაციო განაცხადის შევსებამდე, საერთო სამაგისტრო გამოცდის მონაწილემ უნდა გადაიხადოს აპელაციის საფასური.

თანხის გადახდა შეუძლია, როგორც მაგისტრანტობის მსურველს, ასევე სხვა პირს, რომელიც გადახდისას მიუთითებს გამოცდის მონაწილის შესაბამის მონაცემებს.

აპელაციის საფასურს იხდით სააპელაციო განაცხადის შევსებამდე. ერთი საგნის გასაჩივრების საფასური 50 ლარია (ქულის ცვლილების შემთხვევაში თანხა სრულად ბრუნდება უკან).

გადახდის დანიშნულებაში უნდა ჩაიწეროს აპლიკანტის პირადი ნომერი და საჭიროების შემთხვევაში გვარი და სახელი. იმ შემთხვევაში, თუ გამოსაცდელი უცხო ქვეყნის მოქალაქეა, მან უნდა მიუთითოს პირადობის (ბინადრობის) მოწმობა/პასპორტის სერია და ნომერი.

სააპელაციო განაცხადის შესავსებად უნდა ეწვიოთ ვებგვერდებს: online.naec.ge ან www.naec.ge და აპელაციისათვის განკუთვნილი ღილაკის გამოყენების შემდეგ შესაბამის ველებში უნდა შეიყვანოთ პირადი ნომერი და საგამოცდო საიდენტიფიკაციო (ცხრანიშნა) ნომერი.

მითითებული სიმბოლოების შეყვანის შემდეგ აჭერთ ღილაკს „შესვლა“ და იწყებთ ტესტის იმ ნაწილების მონიშვნას, რომელთა გასაჩივრებაც გსურთ (თუ აპელაციის საფასური არ გაქვთ გადახდილი, სისტემა არ მოგცემთ სააპელაციო განაცხადის გაკეთების შესაძლებლობას).

ამ აღნიშვნების განხორციელების შემდეგ, სისტემა თქვენს განაცხადს ინახავს, როგორც დროებითს, რომელშიც არაერთხელ შეგიძლიათ ცვლილების შეტანა.

დროებითი განაცხადი გაუქმდება, თუ არ გამოიყენებთ ღილაკს „გაგზავნა“. აპელაციის წარმატებით განხორციელების შემთხვევაში აპლიკანტი დაინახავს განაცხადისთვის მინიჭებულ ნომერს.

განაცხდის გაგზავნის შემდეგ მასში ცვლილებებს ვეღარ შეიტანთ.

[sknews.ge]