'ბავშვები ეხვეოდნენ გარშემო' - ახალციხეში ქვეწარმავლები ნახეს

ირმა გვირჯიშვილი, ახალციხეში, თამარაშვილის ქუჩაზე, რვასართულიან კორპუსში ცხოვრობს. მან გველი საკუთარ ავტოფარეხთან ახლოს ნახა: „ჩემი ავტოფარეხიდან სამ მეტრში იყო, დავრეკე მერიაში, რომ შეწამლონ ეს ადგილები. ამ ქუჩაზე, კორპუსთანაც იყო გველი. გარშემო ბავშვები ეხვეოდნენ, აინტერესებდათ, როგორი იყო და რას გააკეთებდა“, – ამბობს ირმა გვირჯიშვილი.

თამარშვილზე მცხოვრებლებმა გველი ერთ-ერთი ადგილობრივის ფარდულთანაც ნახეს: „სარაიაში“ უნდა შევსულიყავი და ბიჭებმა მითხრეს არ შეხვიდე გველიაო, თვითონ დაუნახავთ, ჩემი ფარდულის გვერდით მიცოცავდა. მერე მერიაში დაურეკავთ და შეუწამლიათ იქაურობა“, – ამბობს ემზარ მესხი.

რვასართულიან კორპუსში მცხოვრებლები ამბობენ, რომ გასულ წელს გველები სადარბაზოებშიც შენიშნეს.“ შარშან 4–5 ჯერ ვნახეთ სადარბაზოში გველები“.

ახალციხის მუნიციპალიტეტის მერიაში ქვეწარმავლების შესახებ ინფორმაცია აქვთ: „წინა კვირაში ადგილობრივების მიმართვის საფუძველზე, თამარაშვილზე რამდენიმე კორპუსი შევწამლეთ. მუნიციპალურ საკუთრებაში არსებული ადგილები (სკვერები, პარკები, ახალციხის ტბა, საბავშვო ბაღები და ა.შ.) პერიოდულად მუშავდება შესაბამისი საშუალებებით. გარდა ამისა, მოსახლეობის მომართვის შემთხვევაში ხდება რეაგირება, აღნიშნული ტერიტორიის შეწამვლა-დამუშავება“, - აცხადებენ საზოგადოებასთან ურთიერთობის სამსახურში.


თუ გველს გადაეყარეთ - სპეციალისტის რჩევები

ექიმი გვირჩევს: გველის ნაკბენი

[მარიამ ბარძიმაძე, ახალციხე]