ახალციხის საჯარო სკოლებში ინფრასტრუქტურის რეაბილიტაცია მიმდინარეობს ®

მონიტორინგის ფარგლებში, მიმდინარე სამუშაოებს ადგილზე გაეცნენ რეგიონული განვითარებისა და ინფრასტრუქტურის სამინისტროს შესყიდვების სამმართველოს წარმომადგენლები ოთარ არევაძე და დავით ბერაძე, სამცხე-ჯავახეთის სახელმწიფო რწმუნებულის პირველი მოადგილე შალვა ბერძენიშვილი, ახალციხის მუნიციპალიტეტის მერი ზაზა მელიქიძე, მერის მოადგილე ალექსი ზედგინიძე და ახალციხის საგანმანათლებლო რესურსცენტრის ხელმძღვანელი ხათუნა ხმალაძე.

ამ დროისთვის სამუშაოები მიმდინარეობს სოფლების ურავლის, წნისისა და აწყურის საჯარო სკოლებში. ურაველში და წნისში სანიტარული კვანძები ეწყობა, ხოლო აწყურის საჯარო სკოლაში შენობის სახურავი და ელექტროგაყვანილობა იცვლება.

მთავრობის განკარგულებით, დელეგირებული უფლებამოსილების ფარგლებში, ახალციხის მუნიციპალიტეტს საგანმანათლებლო ინფრასტრუქტურის რეაბილიტაციის მიზნით 760 000 ლარი გამოეყო. ახალი სასწავლო წლის დაწყებამდე 14 საჯარო სკოლაში 18 სარეაბილიტაციო პროექტი განხორციელდება.



გარდა ამისა, სოფელ ურაველში, აგარის სამონასტრო კომპლექსთან მისასვლელი გზის სამუშაოები გრძელდება. პროექტის ფარგლებში გზის 4,8 კილომეტრიან მონაკვეთზე ბეტონის საფარი ეწყობა, სამუშაოები მთის განვითარების ფონდიდან ფინანსდება. რეაბილიტაციის დასრულების შემდეგ, კეთილმოწყობილი გზით ტურისტები, მომლოცველები და ადგილობრივი მაცხოვრებლები ისარგებლებენ.



ახალციხის მუნიციპალიტეტის მერია