ახალციხის მერია ნაძვის ხის შესაძენად 60 000 ლარიან ტენდერს აცხადებს

ნაძვის ხის ფოტო სატენდერო დოკუმენტებიდან

ნაძვის ხის შესაძენად ახალციხის მერიამ ტენდერი დღეს, პირველ ივლისს გამოაცხადა. ახალ წლამდე ხუთი თვით ადრე, თვითმმართველობა ქარხნული წარმოების, ახლი ნაძვის ხის შეძენას გეგმავს.

სატენდერო დოკუმენტების მიხედვით, მას უნდა ჰქონდეს ბუნებრივი, მწვანე ფერი; სიმაღლით არანაკლებ 15 მეტრი, აგებულებით კი ექვსი ფენა. ტოტები უნდა იყოს წყალგამძლე და ცეცხლგამძლე, თითოეული ტოტი არანაკლებ ორი სამაგრი წერტილით.

გარე გამოყენების ტოტების სიგრძე: არანაკლებ 80სმ; დიამეტრი არანაკლებ 6.5მ. დაშორება ძირიდან ტოტებამდე არაუმეტეს 10სმ.
ნაძვის ხის მონტაჟი 2019 წლის პირველიდან 20 დეკემბრის ჩათვლით უნდა განხორციელდეს.

რატომ გამოცხადდა საახალწლო ნაძვის ხის შესაძენად ტენდერი ივლისში, ახალციხის მერია ამაზე კომენტარს ხვალ, ორ ივლისს გააკეთებს.

[თაკო ფეიქრიშვილი, ახალციხე]