შემოსავლების სამსახურმა ახალი განცხადება გაავრცელა

გთავაზობთ განცხადებას უცვლელად:
"შემოსავლების სამსახური კიდევ ერთხელ განმარტავს, რომ საქართველოს მოქმედი კანონმდებლობით, საქონლის იმპორტის გადასახადით დაბეგვრა დამოკიდებულია მის სასაქონლო კოდზე. ვინაიდან გაჩნდა ეჭვი, რომ ინდ. მეწარმე ჯამბულ აბილაძის მიერ შემოტანილ საქონელზე წარდგენილ საბაჟო დეკლარაციაში სასაქონლო კოდი და წონა არასწორად იყო მითითებული აღნიშნულის დადგენისთვის დაინიშნა სასაქონლო ექსპერტიზა. ბრძანება საქონლის გაშვების შემდგომი გასვლით შემოწმების შესახებ წინასწარ ჩაბარდა ჯამბულ აბულაძის მეუღლეს, გაგზავნილ იქნა საქართველოს ფოსტით და ატვირთა პირის ელექტრონულ მისამართზე.

წონისა და კოდის დადგენის მიზნით კანონმდებლობით გათვალისწინებულია დათვალიერება, სინჯის ან ნიმუშის აღება. კონკრეტულ შემთხვევაში, საქონლის (ლითონის ასაწყობი კონსტრუქცია-ერთი ერთეული) სპეციფიკიდან გამომდინარე, ის განხილული იქნა, როგორც საკვლევი ნიმუში. შესაბამისად საჭირო გახდა ზემოაღნიშნული კონსტრუქციის დემონტაჟი და გაფორმების ორგანოში წარდგენა.

აქვე ავღნიშნავთ, რომ თურქეთის რესპუბლიკასა და საქართველოს შორის გაფორმებული თავისუფალი ვაჭრობის შესახებ შეთანხმებით, იმპორტის გადასახადისაგან გათავისუფლებულია მხოლოდ იმ საქონლის შემოტანა, რომლის წარმოშობის ქვეყანა თურქეთია, რაც დადასტურებული უნდა იყოს წარმოშობის სერთიფიკატით (EUR.1). ინდ. მეწარმე ჯამბულ აბულაძის მიერ საქონლის დეკლარირებისას წარმოშობის სერთიფიკატი წარდგენილი არ ყოფილა, შესაბამისად, მასზე საგადასახადო შეღავათი ვერ გავრცელდებოდა.

ამჟამად დასრულებულია შავი ლითონის კონსტრუქციის (მინარეთი) სრულყოფილი სასაქონლო ექსპერტიზა (წარმოდგენილი კონსტრუქციის სასაქონლო კოდი არის 73089099000 იბეგრება იმპორტის გადასახადით 12 პროცენტის ნაცვლად დეკლარირებული 94060038000 კოდისა, რომელიც არ იბეგრება იმპორტის გადასახადით, ხოლო წონამ შეადგინა 2940 კგ ნაცვლად დეკლარირებული 2700 კილოგრამისა) და უბრუნდება მესაკუთრეს", - ნათქვამია შემოსავლების სამსახურის მიერ გავრცელებულ განცხადებაში.