სადახლოსა და კარწახის საბაჟოებზე არადეკლარირებული ოქროს ნაკეთობები ამოიღეს

ფინანსთა სამინისტროს შემოსავლების სამსახურის ინფორმაციით, 27 თებერვალს, საბაჟო გამშვებ პუნქტ "კარწახში", სომხეთის მოქალაქეს ს.ჰ-ს, 16 291 ლარის ღირებულების 243 გრამი არადეკლარირებული ოქროს ნაკეთობები საზღვარზე უკანონოდ შემოჰქონდა.

საქმე, შემდგომი რეაგირების მიზნით, ფინანსთა სამინისტროს საგამოძიებო სამსახურს გადაეცა.

პირველ მარტს, საბაჟო გამშვებ პუნქტშიში "სადახლო-საავტომობილო", რუსეთის მოქალაქეს ა.ა-ს, არადეკლარირებული ოქროს ნაკეთობები და 200 ცალი ბრილიანტის თვალი, საერთო წონით 5.14 გრამი შემოსავლების სამსახურის მებაჟე ოფიცრების მიერ, ეჭვის საფუძველზე, ფიზიკური დათვალიერების შედეგად აღმოაჩნდა.

საქონლის საბაჟო ღირებულებამ 3,581.31 ლარი შეადგინა. საგადასახადო კოდექსის 289-ე მუხლის მე-10 ნაწილის შესაბამისად, სამართალდამრღვევ მოქალაქეს, სანქციის სახით, ფულადი ჯარიმა, 3,581.31 ლარის ოდენობით შეეფარდა.

[sknews.ge]