შეხვედრა რეგიონის ფერმერებთან

შეხვედრა, ამერიკის შეერთებული შტატების საერთაშორისო განვითარების სააგენტოს (USAID) ეკონომიკური აღმავლობის ინიციატივის (EPI) ორგანიზებით შედგა.

შეხვედრის მიზანი იმ პროგრამების პრეზენტაცია იყო, რომლებიც გააადვილებს მეწარმეების ხელმისაწვდომობას ფინანსურ რესურსებთან.

შეხვედრაზე წარმოდგენილი იყო საფინანსო-საკონსულტაციო პროგრამა, ლიზინგის სარგებლობის სქემა, აგროდაზღვევის და დაკრედიტების პროდუქტები.

აღნიშნული პროგრამებით სარგებლობა შეუძლიათ პირებს, რომლებიც მოღვაწეობენ ისეთ სექტორებში, როგორიცაა სამკერვალო, სამშენებლო მასალები, ტურიზმი, შესაფუთი სექტორი. ასევე ფერმერებმა, რომლებიც ღია გრუნტზე და სასათბურე მეურნეობებში აწარმოებენ ბოსტნეულს, თხილის მწარმოებლებმა და სხვა.

ფერმერები და მეწარმეები გაეცვნენ აგრო-დაზღვევის თანადაფინანსების საპილოტე პროექტს, რომელიც ამარტივებს სესხის აღების პროცედურას, აზღვევს სოფლის მეურნეობის პროდუქციის მწარმოებლებს კლიმატური რისკებისგან.

”ახალციხის სასოფლო-საკონსულტაციო სამსახურის” უფროსის გურამ ჯინჭველაძის თქმით, ლიზინგის პროგრამა იმუშავებს იმ შემთხვევაში, თუ ამის შესახებ ინფორმაცია სწორად იქნება მიწოდებული ფერმერებისთვის: ”ამისთვის რეგიონში უნდა იყოს ადამიანი, ვინც უშუამდგომლებს ფერმერს სალიზინგო კომპანიასთან, თორემ ინფორმაციის ასაღებად და სათანამშრომლოდ, გლეხი თბილისში სალიზინგო კომპანიასთან არ წავა”.

ჯინჭველაძე ფიქრობს, რომ ასევე მნიშვნელოვანია აგროდაზღვევის საპილოტე პროგრამაც, თუმცა მისი განხორციელება მიმდინარე წელს ვერ მოესწრება.

[თამუნა უჩიძე, ახალციხე]