ძაღლების თავშესაფრის პროექტს ავტორი უკან აღარ გაითხოვს

სამცხე–ჯავახეთის მხარის რწმუნებულს ბესიკ ამირანაშვილს, ახალციხის მერს ზაზა მელიქიძესა და ძაღლების თავშესაფრის პროექტის ერთ–ერთ ავტორს ლაშა გეგეჭკორს შორის შეხვედრა დახურულ კარს მიღმა, დაახლოებით, ორი საათის განმავლობაში მიმდინარეობდა.

„მცირე ტექნიკური უზუსტობა იყო, რაზეც მკაფიო პასუხი მივიღე სახელმწიფო რწმუნებულისგან, ასევე, ახალციხის მუნიციპალიტეტის მერისგან და კმაყოფილი მივდივარ. დღევანდელმა შეხვედრამ სასიკეთო შედეგი გამოიღო. საავტორო უფლებები მთლიანად ხელუხლებელია. თავშესაფრის კონცეფცია, რომელიც თავიდან წარმოვადგინეთ არ ირღვევა. ინარჩუნებს მთლიანობას და თავის შინაარს, ამიტომ პროექტს უკან აღარ გავითხოვ“, – გვითხრა შეხვედრის დასრულების შემდეგ გეგეჭკორმა.

მისი თქმით, პროექტი ისე განხორციელდება, როგორც მუნიციპალური განვითარების ფონიდ მიერ გამოცხადებულ ტენდერშია გათვალიწინებული.

სამცხე–ჯავახეთის მხარის რწმუნებულის მოადგილის შალვა ბერძენიშვილის განმარტებით, პროექტის ავტორთან შეთანხმდნენ, რომ თანხის დაზოგვის მიზნით, თავშესაფრის ასაშენებლად იმ შენობებს გამოიყენებენ, რომელიც უკვე არსებობს: „როცა სამუშაოები დაიწყება, კონცეფციის ავტორი ლაშა გეგეჭკორი გაუწევს მას გარკვეულ ზედამხედველობას. იდეა სრულად იქნება დაცული“.

შეგახსენებთ, რომ მიუსაფარ ცხოველთა თავშესფარი ახალციხეში, სოფელ ფარეხაში უნდა აშენდეს. „სოციალური პროგრამებისა და განვითარების ცენტრის“ წარმომადგენელმა ლაშა გეგეჭკორმა რეგიონს თავშესაფრის პროექტი უფასოდ გადასცა, თუმცა ტენდერის გამოცხადების შემდეგ, მასში შეტანილმა ცვლილებებმა გეგეჭკორის უკმაყოფილება გამოიწვია. იგი აცხადებდა, რომ თავშესაფარში ვოლიერების გაზრდა თვითმმართველობას შესაძლოა ცხოველების მუდმივად გამოკეტვისთვის გამოიყენებინა. აიტომ მან მხარსი რწმუნებულს ღია წერილით მიმართა და პროექტის უკან გაწვევა სთხოვა. დღევანდელი შეხვედრა, სწორედ ამ წერილის გამოქვეყნების შემდეგ დაიგეგმა.

[თინათინ ზაზაძე, ახალციხე]